Individwu ħallas €7,000 għal permess ta’ residenza frawdolenti wara li l-prezz ġie nnegozjat minn €12,000 oriġinali tiegħu, semgħet il-Qorti nhar l-Erbgħa quddiem il-Maġistrat Donatella Frendo Dimech. L-individwu, raġel Marokkin, kien wieħed mix-xhieda fil-kumpilazzjoni tal-provi kontra l-eks impjegata ta’ Identità, Maria Rita Spiteri, u n-negozjant tal-karozzi Bernard Attard.
Huma qed jiġu akkużati b’ħasil ta’ flus, traffikar ta’ persuni, frodi u falsifikazzjoni li jinvolvu identitajiet misruqa mill-aġenzija tal-identità tal-gvern Identità. Meta tressqu l-Qorti l-ġimgħa li għaddiet, irriżulta li l-każ ġej minn investigazzjoni tal-Pulizija fl-2023 ta’ ċittadini ta’ pajjiżi terzi li kisbu dokumenti ta’ residenza frawdolenti.
Ħames persuni kienu ġew arrestati u kollha qalu lill-Pulizija li Attard u Spiteri kellhom rwol li jipprovdulhom dokumenti foloz, b’Attard ikun responsabbli biex jiġbor flushom. Xehed Hasan Qasba, li ilu jgħix Malta għal aktar minn disa’ snin, fejn irrakkonta kif sema’ b’Attard fl-2021, meta l-barbier tiegħu qallu li jista’ jintroduċih lil xi ħadd li jista’ jġiblu l-karta tal-identità. Eventwalment huwa ltaqa’ ma’ Attard.
“L-ewwel talabni €12,000, u għedtlu li kienu wisq,” qal Qasba. Eventwalment qablu fuq €7,000, u hu ta lil Attard €4,000 bil-quddiem. Huwa ssejvja l-kuntatt tal-mobajl ta’ Attard bħala “Il-Malti tal-Permess.” Attard ħadu fl-uffiċini ta’ Identità u spjegalu kif mara kienet se “tirranġa” d-dokumenti għalih.
Darba fl-uffiċini, iltaqa’ ma’ Spiteri, li kkonfermat li se tirranġalu d-dokumenti. Ġimagħtejn wara, reġa’ ċempel fl-uffiċini u Spiteri qaltlu li Attard kien il-ħabs, iżda hi kienet se tirranġa biex jieħu l-karta tal-identità.
Ġranet wara, ġabar il-karta tal-identità tiegħu. Meta mistoqsi dwar l-indirizz fuq il-karta tal-identità, huwa qal Buġibba, iżda ammetta li dak ma kienx l-indirizz tiegħu. Xhud ieħor, Ali Abdulsalam Bashir Tarhuni, qal li hu kien refuġjat Libjan li ġie Malta fl-2019 minn Franza u kellu bżonn passaport.
“Kont nibża’ li jibagħtuni lura f’pajjiżi,” huwa qal. Tenna li kien mar f’ħanut tax-xagħar u fetaħ qalbu dwar il-biża’ li kellu man-nies li kienu fil-post. “Hemm qaluli li kienu jafu lil xi ħadd li jista’ jsolvi s-sitwazzjoni tiegħi.”
In-numru ta’ Attard għaddewh lilu u kienu ltaqgħu Tas-Sliema u Attard wiegħdu li se jgħinu, basta jħallas €8,000. Tuhani qallu li kien wisq, u din iċ-ċifra tnaqqset għal €6,000. Intalab ukoll iħallas depożitu ta’ €500. Ix-xhud ammetta li dak iż-żmien kien xettiku, iżda meta mar fl-uffiċini ta’ Identità ħaseb li dak li kien qed jagħmel kien leġittimu.
Darba fl-uffiċini, iltaqa’ ma’ Spiteri, li kienet ħadet ħsieb id-dokumenti tiegħu. Ingħata l-karta tal-identità tiegħu, iżda l-applikazzjoni tiegħu għall-istatus ta’ refuġjat ġiet miċħuda, u ntbagħat lura Franza. Aktar kmieni waqt is-seduta, il-Qorti semgħet lill-Ispettur Lara Butters tispjega li l-investigazzjonijiet bdew fl-aħħar tal-2023, meta l-Pulizija ġiet infurmata dwar tliet Eġizzjani li kienu kisbu permessi ta’ residenza u allegatament kienu miżżewġin ma’ ċittadini mir-Renju Unit.
Ġie stabbilit li l-ebda wieħed mill-Eġizzjani ma kien fil-fatt miżżewweġ jew f’relazzjoni ma’ ċittadini tar-Renju Unit. Tnejn mill-Eġizzjani ġew arrestati, akkużati, u weħlu l-ħabs għal sitt xhur u mbagħad deportati lejn l-Eġittu. Il-kawża fil-Qorti kontra t-tielet persuna għadha pendenti.
Butters qalet li investigazzjoni bir-reqqa tas-sistema tal-login ta’ Identità wriet li l-burokrazija għat-tliet Eġizzjani kienet tgħaddi minn Spiteri permezz tal-username tagħha Spiterim250. Waqt l-investigazzjonijiet, it-tliet Eġizzjani ammettew li ħallsu lil Attard għall-permess ta’ residenza tagħhom u ammettew li qatt ma żżewġu ċittadini mir-Renju Unit. Wieħed minnhom ammetta li ħallas lil Attard €5,000.
Il-prosekuzzjoni oġġezzjonat għat talbiet tal-libertà proviżorja mid-difiża, u semmiet tħassib li l-akkużati jistgħu jippruvaw ibagħbsu l-evidenza, speċjalment peress li ċittadini mir-Renju Unit kienu għadhom iridu jixhdu fil-każ.
L-avukati difensuri argumentaw li l-akkużati ngħataw il-police bail wara l-arrest tagħhom u l-evidenza qatt ma ġiet imbagħbsa. Il-libertà proviżorja ġiet miċħuda mill-Qorti.
L-Ispetturi Andy Rotin, Keith Darmanin, Lara Butters u Christian Abela mexxew il-prosekuzzjoni bl-għajnuna tal-avukati tal-AĠ Manuel Grech u Andrea Zammit.
L-avukati Alfred Abela u Rene Darmanin assistew lil Spiteri. L-avukati Josè Herrera u Matthew Xuereb assistew lil Attard.
Il-każ ikompli fis-26 ta’ Frar.
