Tifel adoloxxenti li weġġa’ serjament f’inċident tat-traffiku, li seħħ meta ħabib tiegħu kien qed isuq il-vann ta’ ommu mingħajr liċenzja, kellu l-kumpens tiegħu jiżdied minn €45,700 għal €64,000. L-inċident seħħ fit-3 ta’ Ottubru 2010, meta ġuvni ta’ 18-il sena – li ma kellux liċenzja tas-sewqan – rikkeb tlieta minn sħabu fil-vann ta’ ommu.
Il-vann ħabat ma’ karozza oħra hekk kif ipprova jaqbeż karozza fil-Bidnija. Tnejn mill-passiġġieri, li kienu aħwa ta’ 15 u 17-il sena, sofrew ġrieħi gravi. Iż-żgħir weġġa’ x-xedaq u l-ħanek u kellu snienu maqlugħa mal-impatt. Ħuh il-kbir kellu diversi ġrieħi fuq saqajh u dirgħajh u kellu bżonn operazzjoni. Huwa sofra 15 fil-mija diżabbiltà.
Omm l-aħwa fetħet kawża ċivili kontra x-xufier u ommu. Omm ix-xufier sostniet li ma kinitx taf li binha kien se jsuq il-vann. Huwa kien qalilha li ħabib tiegħu, li kellu liċenzja, kellu bżonn jissellef. Iżda l-Qorti sabet li kemm ix-xufier kif ukoll l-omm kienu responsabbli għal dak li ġara: għalkemm ix-xufier kien qed isuq il-vettura ta’ ommu, bħala sid il-vann kellha tkun aktar viġilanti fuq min kien qed juża l-vettura tagħha.
Il-Qorti ordnathom iħallsu € 7,050 lit-tifel iż-żgħir u €45,714 lill-kbir. Is-sewwieq u l-omm appellaw kif għamlet omm l-aħwa. L-appell tax-xufier u ommu ġie ddikjarat abbandunat peress li ma kienx segwit. Madankollu, il-Qorti tal-Appell laqgħet l-appell tal-aħwa u żiedet id-danni għall-kbir għal €64,000.
L-avukati Veronique Dalli u Andrew Saliba irrappreżentaw lill-aħwa.
