Ħames xhur. Daqshekk ilu jinjora it-talba tagħna l-Prim Ministru. B’Robert Abela jibqa’ jevita li jpoġġi għal intervista ma’ Net News.
Lura fis-sajf tal-2024, proprju fis-17 ta’ Awwissu, din il-kamra tal-aħbarijiet għamlet talba formali lill-Prim Ministru u lin-nies tiegħu sabiex issirlu intervista ta’ mhux aktar minn 30 minuta f’Kastilja… talba li Abela baqa’ jaħrab għal aktar minn ħames xhur.
Minkejja dan, il-Prim Ministru, deher f’diversi okkażjonijiet iżolati jipparteċipa f’intervisti ma’ numru ta’ ġurnalisti minn newsrooms differenti, bl-unika kamra tal-aħbarijiet li baqgħet ma ġietx mistiedna, tkun dik ta’ Net News.
Huma bosta t-temi li bla dubju l-Prim Ministru għandu jwieġeb dwarhom. Iżda dan is-sens ta’ trasparenza jibqa’ ineżistenti fil-ħidma ta’ Robert Abela.
B’nies mill-klikka ta’ Muscat jakkużawh li qas jibda mal-mod kif kien jaġixxi l-Eks Prim Ministru mal-midja.
Dan in-nuqqas ta’ trasparenza qed iwassal biex Abela jibqa’ jevita domandi dwar il-kriżi fis-settur tas-saħħa, il-problema tal-ħaddiema barranin, in-nuqqas ta’ riformi fejn verament huwa meħtieġ, u fuq kollox… domandi leġittimi dwar il-kriżi interna tal-Labour u lista twila ta’ skandli li ħakmu l-pajjiżna.
U quddiem dawn ir-realtajiet… Robert Abela qed jibqa’ ma jaċċettax l-istedina għal intervista ta’ inqas minn 30 minuta – stedina li ilu jaħrab għal aktar minn ħames xhur.
