Floriana Young Stars kisbu rebħa tajba ta’ 3-1 kontra White Hart fl-unika logħba li ntlagħbet mill-kampjonat tal-Hockey 7s.
Il-Greens kienu dejjem fil-vantaġġ għalkemm White Hart qatt ma qatgħu qalbhom u f’ħin minnhom naqqsu l-marġni tal-iskor għalkemm ma kienx biżżejjed. Deemer Rapinett, Justin Farrugia u Marvin Vella skorjaw għall-Greens, b’White Hart inaqqsu l-marġni tal-iskor minn Claire Trusler.
Umpires kienu Dario Cacopardo u Oscar Toledano.
Mill-kampjonat ta’ taħt is-16-il sena, Qormi Daikin għelbu lil Marsaskala Heat 5-2. Lukas Brincat spikka għall-Qriema meta skorja erba’ gowls filwaqt li Sam Cassar żied ieħor għat-tim tiegħu. Kyron Carabott u Alessandro Piscopo naqqsu l-marġni tal-iskor għall-Iskalin.
Umpires kienu Alessandro Amore u Dario Cacopardo.
Mill-kampjonat ta’ taħt it-12-il sena, Marsaskala Heat għelbu lil Żurrieq Wolves 8-4. Tatum Foster u Julienne Carabott skorjaw doppjetta kull wieħed għal Marsaskala b’Saviour Grech, Jan Agius, Zack Galea u Kihanna Meilak li żiedu l-iskor għat-tim tagħhom. Iż-Żrieraq skorjaw il-gowls tagħhom permezz ta’ tripletta ta’ Adam White u gowl ieħor ta’ Ethan Abela.
Umpires kienu Oscar Toledano u Karl Chircop.
F’logħba oħra mill-istess kampjonat, Floriana Young Stars iddominaw il-konfront kontra Qormi Daikin u rebħulhom 12-1. Luke Pisani kien l-eroj għall-Furjaniżi meta skorja ħames gowls b’Gabriel Cordina li niżżel ismu tliet darbiet fost l-iskorers, Elyc Mifsud u Dejan Grech skorjaw żewġ gowls kull wieħed. Zachery Farrugia skorja l-uniku gowl għal Qormi.
Umpires kienu Oscar Toledano u Kane Zammit.
