Ahmed al-Sharaa, l-eks kap ta’ grupp ewlieni tar-ribelli, inħatar President tas-Sirja għal żmien temporanju – b’dan ikun ikkonfermat kważi xahrejn wara li l-grupp tiegħu għen biex ikisser ir-reġim tad-dittatur Sirjan Bashar al-Assad, li llum qed ikun kostrett li jgħix f’eżilju fir-Russja.
Al-Sharaa – li l-grupp tiegħu Hayat Tahrir al-Sham (HTS) darba kien affiljat mal-moviment terroristiku al-Qaeda – fil-fatt, ilu jmexxi pajjiżu mindu l-qawwiet tal-Oppożizzjoni Sirjana daħlu f’Damasku, fit-8 ta’ Diċembru, wara offensiva għall-għarrieda li damet anqas minn ġimgħatejn sakemm inqaleb l-istatus quo fis-Sirja.
Hu, issa, inħatar Aġent President wara laqgħa ma’ gruppi oħrajn tar-ribelli u li mistennija jkunu wkoll sieħba fl-Amministrazzjoni l-ġdida ta’ Damasku.
Dan waqt li l-kelliema għall-Gvern Sirjan transitorju qalu li al-Sharaa, issa, qed jaħdem biex jifforma Kunsill Leġislattiv temporanju fil-kapitali.
