Tfajla ta’ 15-il sena li hija msemmija bħala l-allegata vittma f’każ ta’ bullying, ġiet mixlija fil-Qorti tal-Minorenni b’rapport falz. It-tifla ġiet akkużata li għamlet rapport falz b’intenzjoni ħażina fil-konfront ta’ Jake Dalli Balzan u żewġ minorenni oħra li ssemmew f’każ li għadu għaddej dwar allegat estorsjoni u aggressjoni mwettqa kontriha.
Hija kienet akkużata wkoll li ffalsifikat provi. Dan kien ikkonfermat ukoll kemm mill-avukati ta’ Dalli Balzan kif ukoll mill-prosekuzzjoni fil-Qorti, hekk il-Ħamis komplew il-proċeduri kontra r-raġel. Huwa qed jiġi akkużat li ngħaqad ma’ ħamsa oħra biex jattakka lit-tifla.
Quddiem il-Maġistrat Kevan Azzopardi, l-avukat difensur David Bonello talab biex tiġi trattata b’emergenza t-talba għal ħelsien mill-arrest taż-żagħżugħ. Fuq konferma tal-Ispettur, l-avukat qal li l-allegata vittma tressqet quddiem il-Qorti tal-Minuri, mixlija b’rapport falz fil-konfront ta’ Jake Dalli Balzan u żewġ żgħażagħ minuri oħra. Il-prosekuzzjoni qalet li m’għadhomx joġġezzjonaw għall-ħelsien mill-arrest.
L-Avukat Jason Azzopardi, li huwa l-avukat tat-tifla u qed jidher parte civile għaliha f’dan il-każ, qal li filwaqt li kienet ġiet mixlija li għamlet rapport falz fil-konfront tal-akkużat u oħrajn, dawn l-akkużi mhumiex relatati mal-inċident fejn kienet ġiet attakkata. Hija wieġbet ukoll mhux ħatja tal-akkużi.
Wara deliberazzjoni, il-Qorti preseduta mill-Maġistrat Kevan Azzopardi, laqgħet it-talba għall-pleġġ kontra depożitu ta’ €2,000 u garanzija personali ta’ €18,000, kif ukoll li darbtejn fil-ġimgħa jiffirma fl-Għassa ta’ Raħal Ġdid u jiġi osservat curfew bejn id-9pm u 7am.
Huwa kien ordnat ukoll biex ma jikkuntattja lil ebda xhieda involuti f’dan il-każ u kwalunkwe proċeduri oħra li jinvolvu lill-vittma, inkluż, għalhekk, it-tfajla tiegħu ta’ 13-il sena. Il-każ imur lura għal Novembru li għadda meta t-tfajla ressqet rapport tal-Pulizija fil-konfront ta’ sħabha tal-klassi ta’ 13-il sena, li qalet li kienet qed titlob flus mingħandha u heddidilha li jferigħha jekk ma tagħmilx dak li jgħidilha.
F’okkażjoni minnhom it-tifla ħarġet mid-dar tal-familja tagħha fl-Imqabba meta resaq lejha gang b’wiċċhom mgħotti, b’wieħed allegatament iżomm pistola ma’ rasha filwaqt li l-oħrajn aggredewha. Qalet li għarfet waħda mill-vuċijiet tagħhom bħala dik taż-żagħżugħa ta’ 13-il sena li allegatament kienet qed twettaq estorsjoni fuqha kif ukoll Dalli Balzan, li huwa l-għarus ta’ din tal-aħħar.
Hija kompliet tallega li ż-żagħżugħa ta’ 13-il sena kienet tagħtha daqqiet ta’ sikkina. Dalli Balzan qed jiġi akkużat li fera’ ħafif lill-minuri, li kien kompliċi fl-attakk u l-estorsjoni, u li ħa sehem f’gang biex iwettaq reat. Huwa wieġeb mhux ħati tal-akkużi.
L-ispettur Wayne Bonello mexxa l-prosekuzzjoni. Għall-akkużat dehru l-avukati David Bonello u Joseph Borda. L-Avukat Jason Azzopardi deher bħala parte civile.
