Titħabbar il-mewt ta’ Steve Sciberras, raġel ta’ 33 sena minn Ħaż-Żebbuġ, wara li għal għaxar snin kien qed jissielet mal-konsegwenzi ta’ attakk f’qalbu li ġarrab f’Paceville.
Oħtu ż-żgħira, Maria Sciberras, tellgħet tribut emozzjonali fuq Facebook fejn esprimiet il-weġgħa tagħha għall-mewt ta’ ħuha. “Għalfejn kellek tħallini daqshekk kmieni?” kitbet, flimkien ma’ ritratt tagħhom flimkien, l-aħħar wieħed li ħadet miegħu. Hi rrakkontat kif Steve kien qed jirkupra, iżda l-mewt waslet ħabta u sabta.
L-inċident li bidel ħajjet Steve kien seħħ fil-11 ta’ Jannar 2015 f’post ta’ divertiment fi Triq San Ġorġ, f’Paceville. Dak iż-żmien, Steve kellu biss 22 sena meta waqa’ mal-art wara li ħassu ħażin. Huwa ttieħed l-isptar b’ambulanza u ġie ċċertifikat li kien fil-periklu li tal-mewt għaliex kienet waqfitlu qalbu. Infetħet ukoll inkjesta maġisterjali dwar il-każ.
Għal għaxar snin, Steve baqa’ jiġġieled, u qrabatu żammew it-tama li jirkupra għal kollox. Il-mewt tiegħu ħasdet lil bosta, speċjalment dawk li kienu jafu kemm kien żagħżugħ qalbieni u determinat.
Il-komunità ta’ Ħaż-Żebbuġ esprimiet il-kondoljanzi tagħha fuq il-midja soċjali, bosta nies jiftakru f’Steve bħala persuna ta’ qalb kbira. “Nispera li issa sibt il-paċi li tant ħaqqek,” kitbet ħabiba tiegħu fuq Facebook.
Steve jitħalla jibki minn qrabatu u l-ħbieb, li se jiftakruh dejjem bħala żagħżugħ b’qalb kbira u b’determinazzjoni li jkompli jiġġieled minkejja d-diffikultajiet kollha li kellu quddiemu.
