Il-Qorti neħħiet ordni ta’ ffriżar ġenerali imposta fl-2021 fuq Florinda Sultana, ta’ 33 sena, u llimitatha għal ftit inqas minn €2 miljuni. Fil-Qorti ma kienx ħareġ kemm kienu ġew friżati assi għalkemm kienet issemmiet iċ-ċifra ta’ €30 miljun fi flus li kienu ġew maħsula.
L-ordni ta’ ffriżar kienet relatata ma’ akkużi ta’ ħasil ta’ flus u evażjoni tat-taxxa, iffukati fuq żewġ ristoranti proprjetà ta’ missierha, il-futboler internazzjonali Darren Debono, li separatament qed jiffaċċja akkużi ta’ kuntrabandu taż-żejt.
Sultana kienet ġiet akkużata erba’ snin ilu. Hija kienet il-Manager ta’ Il-Porticello, restorant fil-Belt Valletta, u Capo Mulini f’Marsaxlokk. Skont l-akkużi, Porticello u Capo Mulini kienu ċ-ċentru għall-ħasil tal-flus. F’digriet riċenti tal-Maġistrat Leonard Caruana, il-Qorti issa llimitat l-ordni tal-iffriżar għall-ammont li ta’ €2 miljun, dak li qed jiġi valutat mal-ħasil ta’ flus.
L-assi ffriżati issa huma limitati għall-ishma tagħha f’żewġ kumpaniji, MS1 Catering Ltd u Nesvan Company Ltd, €550,000 f’allegati salarji mhux iddikjarati tal-impjegati, €1.08 miljun minn allegat dħul mhux iddikjarat mir-ristoranti ta’ missierha, madwar €200,000 f’depożiti bankarji miżmuma minn Nesvan Ltd u l-assi kollha ta’ MS1 Ltd.
Sultana qed tiffaċċja akkużi separati ta’ ħasil ta ’flus fuq ċirku ta’ kuntrabandu mill-Libja lejn l-Italja. Fil-Qorti ħareġ li Porticello kien ġie blacklisted mid-dipartiment tat-teżor tal-Istati Uniti. .
Iż-żewġ ristoranti involuti fil-każ għadhom operattivi sal-lum, u Sultana qed tkompli tmexxi dak tal-Belt Valletta. L-ordni ta’ ffriżar imposta fl-2021 ma kinitx tidher li żammet lil Sultana lura mill-istil ta’ ħajja lussuża tagħha, xi ħaġa li tħobb tippromovi fuq il-midja soċjali.
Dan jinkludu ħafna safar f’destinazzjonijiet popolari turistiċi kemm fl-Ewropa kif ukoll f’pajjiżi mbiegħda. Dawn jinkludu Capri, Firenze, Verona, Parigi u Manchester fl-Ewropa u t-Tajlandja, it-Turkija, il-Messiku, l-Karibew, Bali, Dubai u għadd ta’ destinazzjonijiet oħra. Hija qed twieġeb mhux ħatja tal-akkużi kollha miġjubin kontriha.
Hija kienet ġiet akkużata f’April tal-2021 flimkien ma’ eks uffiċjal għoli tal-BNF Bank, Albert Buttigieg, b’akkużi kienu qed jimmaniġġjaw żewġ ristoranti tal-ħut, biex jaħslu flus marbuta mal-kuntrabandu taż-żejt. Huma wieġbu mhux ħatja għal bosta akkużi miġjubin kontrihom.
Lejn l-aħħar tas-sena 2020 kienu nħarġu mandati ta’ tfittxija u arrest għal Sultana u Buttigieg waqt operazzjoni estensiva tal-pulizija kontra l-kuntrabandu li rriżultat fl-arresti tal-eks futbolers Darren Debono u Jeffrey Chetcuti, kif ukoll tal-awditur Chris Baldacchino fuq akkużi simili ta’ ħasil ta’ flus.
Investigaturi li kienu qed jaħdmu biex jkissru grupp ta’ kriminalità organizzata li allegatament mexxa racket ta’ kuntrabandu ta’ fjuwil ta’ €30 miljun, kienu rabtu dawn il-kumpaniji li għandhom ristoranti ma’ Darren Debono li kien arrestat f’Diċembru 2020.
Il-kumpaniji kollha kellhom l-istess indirizz ibbażat fis-Swieqi u jaqsmu għadd ta’ karatteristiċi simili inkluż mudell ta’ tranżazzjonijiet bankarji, traċċi ta’ flus u operazzjonijiet ta’ kuljum, kif ukoll awditur komuni. Meta kien xehed fil-bidu tal-proċeduri kriminali kontra Sultana u Buttigieg, l-ispettur James Turner ta dettalji dwar investigazzjonijiet fir-ristoranti tal-Belt Valletta u ta’ Marsaxlokk.
Ir-ristoranti adottaw l-istess metodu ta’ ħlas u kull wieħed kellu s-sistema ePOS tiegħu. Il-likwidità ta’ kuljum ma ġietx depożitata, u b’hekk ġew evitati mistoqsijiet mill-banek, qal l-ispettur lill-qorti. Fil-Qorti ħareġ ukoll li Buttigieg ipprovda servizzi bankarji korporattivi lill-eks futboler f’dak li kien il-Banif Bank (illum BNF), u ta għajnuna interna li ppermettiet lill-klijent jevita s-sistema ta’ ħasil tal-flus u jevita l-iskoperta ta’ saffi finanzjarji.
Sultana użat id-dritt tagħha għas-skiet meta kienet ġiet arrestata d-dar fil-Mosta. Tfittxija fid-dar tagħha sabet madwar €52,000 fi flus kontanti, oġġetti varji tad-ditta fosthom Gucci u Armani u 10 arloġġi, fosthom Rolex, vażetti kbar tal-ħġieġ li fihom karti tal-flus u muniti kif ukoll dokumenti marbuta mal-bejgħ fir-ristoranti ta’ Porticello, Capo Mulini, Silver Horse u Onda Blu.
Aktar tard il-mara ġiet interrogata u mitluba tispjega l-pussess ta’ dawk l-oġġetti kif ukoll Audi A1 li l-akkwist tagħha ma seta’ jkun marbut ma’ xi tranżazzjoni bankarja. L-Ispettur Danilo Francalanza, mill-iskwadra ta’ kontra l-ħasil tal-flus, kien xehed dwar ir-rwol tiegħu fit-tfittxija fid-dar ta’ Sultana.
Uffiċjal ieħor mill-istess taqsima, s-Surġent Francesco Farrugia kien iddeskriva t-tfittxija fir-residenza ta’ Albert Buttigieg fis-Swieqi f’Diċembru, li matulha nqabdu numru ta’ dokumenti u apparat elettroniku. Il-parti tat-tfittxija mbagħad kienet għaddiet Marsaxlokk, fittxet ġewwa Capo Mulini u żewġ garaxxijiet interkonnessi wara r-ristorant u qabdet dokumenti u apparat ieħor.
Waqt l-interrogazzjoni tiegħu, Buttigieg ma setax jispjega kif in-negozju, iddikjarat li qed jiffaċċa problemi kbar, kien għadu rnexxielu jirreġistra qligħ ta’ €1 miljun. BNF Bank p.l.c kien qal li Albert Buttigieg ma kellu l-ebda rabtiet mal-Bank u ma kien assoċjat mal-kondotta tan-negozju tal-bank bl-ebda mod.
Il-bank kien għamilha ċara li jikkonforma mal-liġijiet u r-regolamenti kollha applikabbli għan-negozju tal-banek u jikkoopera b’mod attiv mar-regolaturi u l-awtoritajiet tal-infurzar tal-liġi f’kull mument. L-Avukati Stefano Filletti u Martina Cuschieri huma l-avukat difensuri ta’ Sultana. L-Ispetturi Joseph Xerri, James Turner u Omar Caruana qed imexxu il-prosekuzzjoni fil-każ assistiti mill-avukat tal-AĠ Antoine Agius Bonnici.
