“Dak li ġara fil-Qorti meta Christian Borg ġie liberat ikompli jikkonferma kemm l-għodda ta’ Inkjesti Maġisterjali hija importanti sabiex niżguraw li ssir ġustizzja vera.”
Hekk saħaq l-editorjal tal-Ħadd fis-Sunday Times of Malta b’reazzjoni għal dak li ġara nhar it-Tlieta 18 ta’ Frar, meta l-ħabib ta’ Robert Abela Christian Borg kien illiberat minn kull akkuża minħabba li l-Korp tal-Pulizija naqas li jippreżenta traskrizzjoni tax-xhieda; ċioè naqas milli jiżgura element fundamentali fil-liġi kriminali.
L-editorjal sostna li l-provi tar-reat ma ġewx preżentati fil-konfront ta’ persuna li hija viċin tal-Prim Ministru; dan apparti li Christian Borg innifsu kellu wkoll każijiet oħrajn relatati anke ma’ traffikar ta’ persuni.
L-editur kompla li din il-kwistjoni kollha tqajjem bosta mistoqsijiet, kemm dawk ta’ inkompetenza min naħa tal-istituzzjonijiet ta’ pajjiżna kif ukoll mistoqsijiet oħra dwar jekk din il-manuvra seħħitx minħabba r-relazzjoni mill-qrib ta’ Borg mal-Prim Ministru.
Dan apparti mistqosijiet dwar il-fatt li l-uffiċjal tal-Pulizija li mexxa din il-kawża kontra Borg, kien għamel żmien qed jiġi investigat dwar allegati ‘cover-ups’ rigward politiċi ewlenin tal-Partit Laburista.
It-Times titkellem ukoll fuq il-ħtieġa li ma tinbidilx il-liġi tal-Inkjesti Maġisterjali… sabiex niżguraw li ssir ġustizzja vera, il-Gvern għandu jħalli l-poteri kollha neċessarji ħalli jiġu stabbiliti l-motivi kollha wara kull tip ta’ ħażen.
L-Editorjal għalaq billi sostna kif din il-liġi ser tħalli spazju sabiex affarjiet bħalma rajna fil-każ ta’ Christian Borg jibdew isiru ta’ spiss – kemm minħabba inkompetenza mill-istituzzjonijiet u kemm minħabba manuvri bi ħsieb sabiex xi ħadd jew ieħor jiskappa l-ġustizzja.
