Il-każ tad-droga li insterqet fis-satra tal-lejl fis-sigħat bikrin tal-Ħadd qed tkompli toħloq pressjoni enormi fuq il-Prim Ministru. Dan hekk kif issa, Robert Abela qed jgħid illi fil-verità l-Ministru Byron Camilleri ma rriżenjax.
Din il-konfużjoni inħolqot wara li lbieraħ filgħaxija l-Parlament kellu jiġi sospiż ħames darbiet minħabba li l-Gvern irrifjuta li jsir dibattitu dwar din it-tema urġenti u sensittiva.
Ma’ Net News, Robert Abela qal li hu għandu fiduċja f’Byron Camilleri. Skont hu, il-Ministru ma rriżenjax. Dan minkejja li Byron Camilleri stess, il-Ħadd, iddikjara li ta r-riżenja tiegħu lill-Prim Ministru.
Intant, matul il-jum, il-Ministru tal-Intern ma tfaċċa imkien – la fil-Ministeru u lanqas għas-seduta Parlamentari.
Meta affaċjat minn Net News, il-Prim Ministru baqa’ ma qalx fejn jinsab il-Ministru Camilleri wara li inżamm moħbi għal ġurnata sħiħa, u lanqas biss kien preżenti fil-Parlament.
Intant, din il-konfużjoni ħarġet ukoll b’mod ċar meta l-membri tal-Gvern ġew affaċjati b’mistoqsija diretta: jekk jaqblux mad-deċiżjoni li ħa Robert Abela li jżomm miegħu lil Byron Camilleri.
Fil-fatt, kien hemm min ħassu skomdu li jwieġeb. B’uħud jgħidu li l-Ministru Camilleri għamel sew u oħrajn ġew ordnati jgħidu illi jaqblu ma’ Abela.
Interessanti l-fatt li ħadd ma wieġeb min se jġorr responsabiltà politika.
Il-Ministru Jonathan Attard minn naħa tiegħu ma weġibx għalfejn id-droga ma kinitx inqerdet. U x’kienet ir-raġuni għaliex kienet qed tinżamm għand l-AFM f’Ħal Safi.
Dwar dan il-każ, ġie sospiż il-Brigadier tal-Armata. Iżda ħadd ma ġarr responsabbiltà politika.
