Missier, li flimkien ma’ ibnu jinsab mixli bi qtil ta’ raġel permezz ta’ daqqiet ta’ sikkina fil-Ħamrun, m’għandux jinstab ħati ta’ omiċidju volontarju peress li mar hemm biex jikkalma lil ibnu u qabad sikkina wara li ra lil ibnu miksi bid-demm, qed jargumenta l-avukat tiegħu.
L-Avukat Roberto Montalto talab lill-ġurati biex iżommu f’moħħhom id-dinamika li wasslet għall-mewt ta’ Brandon Pace ta’ 21 sena magħruf bħala “Galalli. Dr. Montalto kien qed jagħmel id-difiża tiegħu fil-ġuri kontra Kurt Grech ta’ 31 sena, magħruf bħala in-Nemes, u missieru Joseph ta’ 61 sena, it-tnejn mill-Pietà.
Sadanittant ftit qabel nofs inhar il-ġuri ġie sospiż minħabba li erba’ ġurati fosthom il-Prim Ġurat ma ħassewhomx fiżikament sew u li dawn spiċċaw ukoll jittieħdu b’ambullanza li waslet quddiem il-Qorti. Huma ġew mgħejjuna minn żewġ tobba. Il-Qorti ssospendiet il-ġuri għal għada l-Ħamis.
L-akkużati qed iwieġbu mhux ħatja tal-qtil ta’ Brandon Pace ta’ 21 sena fit-2 ta’ April 2017 fi Triq Giovanni Barbara, il-Ħamrun. It-tnejn huma akkużati b’omiċidju volontarju, pussess illegali ta’ skieken, kisru tal-paċi pubblika u l-ordni u li heddew lil omm il-vittma, Lisa Pace, u s-sieħba Jessica Bilocca. Bilocca kellha tifel minn Kurt Grech.
Hu waħdu jiġi mixli li weġġa’ gravi lil Bilocca permezz ta’ sikkina. Il-missier jinsab mixli wkoll li waqt il-ġlieda hedded lil oħt il-vittma, Donna Pace, b’sikkina. Il-ġuri, huwa ppresedut mill-Imħallef Consuelo Scerri Herrera, issa jinsab fit-tmien jum tiegħu.
Il-prosekuzzjoni, permezz tal-att ta’ akkuża, qed issostni li fit-2 ta’ April 2017, Pace kien id-dar tiegħu mat-tfajla tiegħu, Jessica Bilocca. Ftit qabel, Kurt Grech wasal hemm u beda jinsulenta lil Bilocca li kien fuq il-gallarija.
Iktar tard Grech qal lill-pulizija li mar hemm għax Bilocca kien ċempel lil ommu u insulta fuq kwistjoni li kienet tinvolvi lil binhom. Huwa ħa żewġ skieken miegħu f’każ li Pace kien hemm, qal lill-pulizija.
Meta wasal, Pace ffaċċja lil Kurt. Sadanittant, il-ġenituri ta’ Kurt waslu f’karozza separata.
Inqalgħet ġlieda. F’ħin minnhom ix-xhieda qalu li raw lil Pace jaqa’ mal-art u lil Kurt jaqbeż fuqu u li t-tnejn kienu bis-skieken. Waqt il-ġlieda, Kurt qal li aċċidentalment laqat lil Bilocca. Omm Pace, Lisa, qalet li, meta binha pprova jidħol fil-blokk ta’ appartamenti, Joseph tah daqqa ta’ sikkina f’daharha. Kurt Grech sofra ġrieħi f’ġenbu u kellu jittieħed l-isptar għall-kura.
Id-difiża qed issostni li Kurt Grech mar hemm biex jipproteġi lil ibnu u ħa s-skieken f’każ li kellu jipproteġi lilu nnifsu minn Pace li hu qies bħala “perikoluż” L-Erbgħa l-Avukat Montalto qal li Joseph Grech ma kienx hu li nstiga s-sitwazzjoni dakinhar.
Huwa segwa lil ibnu sad-dar tal-Ħamrun ta’ Pace f’karozza separata biex jikkalmah. Xhieda xehdu li pprova jikkalma s-sitwazzjoni meta l-madum kien qed jitfa’ waqt il-ġlieda. Madankollu, qal l-avukat, f’xi ħin, Joseph Grech ra lil Pace li kien jaf li huwa raġel perikoluż, jiġġieled ma’ ibnu u mbagħad rah miksi bid-demm, il-missier ħataf waħda mis-skieken li hu ma ħax miegħu u xhieda rawh jagħti bis-sikkina f’dahar Brandon, sostna l-Avukat difensur.
Madankollu, insista, li l-provi ma kkonkludewx liema mill-feriti tad-dahar kienet ikkawżata minn Joseph Grech. L-esperti qalu li waħda mill-feriti tad-dahar setgħet kienet fatali. Iżda l-evidenza wriet ukoll li l-ferita tad-dahar segwiet ferita oħra fis-sider li kienet meqjusa fatali, li kienet fil-qalb ta’ Pace.
L-evidenza forensika wriet li l-ħwejjeġ ta’ Kurt kienu miksija bid-demm. Li kien hemm żewġ skieken, waħda sewda u l-oħra safra. Is-sikkina sewda kellha d-DNA ta’ Kurt Grech. Dr. Montalto qed jirrappreżenta lill-akkużat mal-avukati Edward Gatt u Kathleen Grima filwaqt li l-avukati Rachel Tua u Ishmael Psaila qed jirrappreżentaw lill-familja tal-vittma. L-avukati Kevin Valletta u Kaylie Bonett, mill-uffiċċju tal-Avukat Ġenerali, qed imexxu l-prosekuzzjoni.
