Il-ġuri li jirrigwrdja omiċidju li seħħ kważi tmien snin ilu fil-Ħamrun qed ikompli wara li t-tabib Edward Cherubino xehed wara nofs inhar li l-ġurati jinsabu stabbli u f’qagħda li jistgħu jkomplu jisimgħu x-xhieda fil-ġuri.
Id-difiża, l-Ħamis filgħodu talbet lill-Imħallef Consuelo Scerri Herrera biex ixxolji l-ġuri dwar il-qtil tal-“Galalli” fejn qalet li “ma tħossx li l-ġurati jinsabu f’sikkithom” u dan wara li ħamsa minn disa’ ġurati spiċċaw ma jifilħux. Dan seħħ wara li tabib li invistahom qal li għandhom “chest infection.”
Il-prosekuzzjoni ma qablitx mad-difiża u qalet li temmen li għandu jsir eżami minn tabib ieħor sabiex tingħata ‘second opinion’ lill-Qorti dwar il-kundizzjoni medika tal-ġurati. Il-Qortifilgħodu semgħet lit-tabib Deo Debattista li qal li l-ħames ġurati ġew eżaminati mill-ġdid il-Ħamis filgħodu wara li dawn ħassewhom ma jifilħux l-Erbgħa f’nofsinhar.
Qal li jinsabu ħafna aħjar mill-Erbgħa. Mistoqsi dwar il-kundizzjoni medika u l-mediċini li qed jingħataw, qal li l-ġurati inkwistjoni għandhom ‘chest infection’ u qed jingħataw mediċina li ma tħeddilhomx u ma tnaqqsilhomx il-konċentrazzjoni.
Minkejja dan, l-Imħallef Consuelo Scerri Herrera qalet li qabel ma tieħu deċiżjoni, għas-serħan tal-moħħ, kienet se tordna li l-ġurati jiġu eżaminati minn tabib ieħor sabiex tingħata ‘second opinion’ dwar l-istat ta’ saħħa tagħhom. Fil-fatt hekk seħħ u ssejjaħ t-tabib Edward Cherubino, li qal li fiċ-ċirkostanzi l-ġurati inkwistjoni huma stabbli.
Ġuri jkun kompost minn disa’ ġurati u tlieta supplenti (ta’ riżerva) u l-fatt li hemm ħamsa ma jifilħux ma jagħmilhiex possibbli li deċiżjoni tittieħed minn disa’ ġurati. Brandon Pace kien inqatel b’ħames daqqiet ta’ sikkina fit-2 ta’ April 2017, fi Triq Giovanni Barbara fil-Ħamrun. Bil-qtil jinsabu akkużati Joseph Grech ta’ 61 sena u ibnu Kurt ta’ 31 sena magħruf bħala “in-Nemes”.
Minbarra l-qtil qed jiġu akkużati wkoll bil-pussess ta’ skieken, theddid u ksur tal-paċi pubblika. Il-ġuri jinsab fl-istadju fejn qed jitressqu l-provi mid-difiża.
Il-prosekuzzjoni qed titmexxa mill-Avukati Kevin Valletta u Kaylie Bonett mill-Uffiċċju tal-Avukat Ġenerali. L-akkużati qed jiddefenduhom l-Avukati Roberto Montalto, Edward Gatt u Kathleen Grima. L-Avukati Rachel Tua u Ishmael Psaila qed jidhru għall-familja tal-vittma.
