L-avukati li jirrappreżentaw lil wieħed mill-akkużati fil-każ Vitals talbu lill-Qorti teskludi r-rapport tal-espert ewlieni, bl-argument li peress li huwa rrifjuta li jixhed, huma ġew miċħuda mill-opportunità li jagħmlulu l-kontroeżami.
Iktar kmieni dan ix-xahar, l-accountant forensiku Jeremy Harbinson li mexxa l-inkjesta tal-Vitals, ippreżenta affidavit lill-Qorti fejn qal li rrifjuta li jixhed f’Malta minħabba l-biża’ għas-sigurtà tiegħu. Harbinson qal li l-esperjenzi u l-għarfien li kiseb f’dawn l-aħħar seba’ snin kienu jfissru li “qatt ma kien se jirritorna Malta.”
Il-Qorti ppreseduta mill-Imħallef Edwina Grima, semgħet it-talba tad-difiża biex ma tqiesx ir-rapport ta’ Harbinson fl-inkjesta tal-Vitals bħala prova ammissibbli. Il-prosekuzzjoni argumentat li d-difiża tista’ titlob lil Harbinson biex jixhed permezz ta’ proċedura rogatorja, fejn tista’ tintalab assistenza minn qorti barranija.
Sostniet ukoll li r-rapport kien miktub skont il-liġi. L-Imħallef Grima qalet li se tieħu deċiżjoni aktar tard. L-avukati difensuri Franco Debono, Stefan Tonna Mercieca u Charles Mercieca argumentaw ukoll li Harbinson kien qed iwettaq reat kriminali billi rrifjuta li jixhed.
Għalhekk, għandu jiġi investigat mill-Kummissarju tal-Pulizija. Madankollu, l-imħallef ma verbalizzatx dawn it-talbiet f’din is-seduta. F’seduta preċedenti, l-imħallef ordnat lil Harbinson biex jibgħat l-affidavit oriġinali.
L-imħallef ikkonfermat li l-Qorti rċeviet l-affidavit oriġinali. L-inkjesta, li swiet aktar minn €10 miljun, intużat mill-Avukat Ġenerali u l-Pulizija biex jipproċedu lill-Eks Prim Ministru Joseph Muscat, lill-Eks Chief of Staff tiegħu Keith Schembri u lill-Eks Ministru Konrad Mizzi għall-allegat involviment tagħhom fil-konċessjoni frawdolenti tal-isptarijiet.
Huma qed jiffaċċjaw akkużi flimkien ma’ 11-il individwu ieħor u tmien kumpaniji li jinsabu akkużati b’ħasil ta’ flus u reati kbar oħra. Wara li tressqu l-Qorti, il-prosekuzzjoni ħarġet ordni ta’ ffriżar li tiswa miljuni. Id-difiża kienet qed tikkontesta din l-ordni ta’ ffriżar fil-Qorti
L-Avukati Francesco Refalo, Rebecca Spiteri u Shelby Aquilina qed imexxu l-prosekuzzjoni f’isem l-AĠ.
