L-Assoċjazzjoni tal-Industrija tal-Entertainment u l-Arti ta’ Malta (MEIA) tafferma li viżjoni għall-futur ta’ Malta ma tistax tkun kompluta mingħajr l-inklużjoni sħiħa tal-kultura, il-kreattività u d-divertiment.
L-MEIA qalet fi stqarrija li l-proċess ta’ konsultazzjoni għal Envision 2050 naqes milli jinvolvi lis-settur kreattiv u lir-rappreżentanti tiegħu. Din l-esklużjoni tqajjem tħassib serju dwar id-direzzjoni strateġika li Malta beħsiebha tieħu fit-tfassil tal-iżvilupp fit-tul tagħha u tenfasizza diżkonnessjoni inkwetanti.
L-MEIA lbieraħ ġiet infurmata biex tippreżenta proposta wara li l-konsultazzjoni kienet għalqet u miftuħa għal feedback pubbliku. Dan jenfasizza nuqqas sistematiku ta’ konsiderazzjoni biex l-industriji kulturali u kreattivi jkollhom vuċi fil-viżjoni fit-tul tal-pajjiż.
L-MEIA qalet li l-kultura u l-kreattività mhumiex biss aspetti simboliċi jew estetiċi tas-soċjetà; huma forzi ekonomiċi u soċjali b’saħħithom li jinfluwenzaw diversi industriji. Fid-diskors tiegħu tat-23 ta’ Frar, il-Prim Ministru enfasizza li “l-kultura u l-identità tagħna huma l-ikbar saħħiet tagħna,” iżda meta tiġi biex titfassal strateġija għall-futur, dawn l-elementi jibqgħu assenti mid-diskussjoni nazzjonali. Kif nistgħu nippjanaw għal Malta ta’ għada waqt li ninjoraw dak li jiddistingwina u dak li nixtiequ nsiru?
Il-konferenza ta’ Envision 2050 naqset milli tagħti kas tas-settur kreattiv ħaj u dinamiku li jifforma l-kultura kontemporanja. Pajjiżi avvanzati diġà rrikonoxxew l-importanza strateġika tal-kreattività u implimentaw politika li jsostnu u jkabbru dawn l-industriji flimkien ma’ oħrajn.
Kelliema għall-MEIA qalet li l-esklużjoni tas-settur kreattiv ta’ Malta mill-ippjanar nazzjonali fit-tul hija kemm opportunità mitlufa kif ukoll xenarju allarmanti. Il-kreattività u l-kultura m’għandhomx jiġu meqjusa bħala ħsieb sekondarju, iżda bħala pilastru fundamentali tal-futur. Mingħajr integrazzjoni strateġika, nirriskjaw li niddgħajfu mhux biss il-pajsaġġ kulturali tagħna, iżda wkoll il-koeżjoni soċjali u l-potenzjal ekonomiku tagħna.
L-MEIA titlob għal inklużjoni immedjata u sostanzjali tas-settur kreattiv fl-ippjanar strateġiku fit-tul ta’ Malta. Il-gvern għandu jinvolvi kemm lis-settur kulturali pubbliku kif ukoll lil dak privat, jirrikonoxxi l-kontribut ekonomiku u soċjali tiegħu, u jiżviluppa politika li tiżgura t-tkabbir u s-sostenibbiltà tiegħu.
L-MEIA staqsiet kif se jiġi mrawwem u ppożizzjonat it-talent f’din il-viżjoni? Kif se jiltaqgħu flimkien il-kultura u l-kreattività mal-edukazzjoni, it-teknoloġija u l-ħajja soċjali f’Malta tal-2050? Kif qed jippjana l-gvern biex jiżgura li min qed jikkrea llum jiġu apprezzati bħala l-arkitetti tal-wirt ta’ għada?
Malta ma tistax taffordja li tara l-kultura bħala ħaġa sekondarja. Pajjiż li jħares ’il quddiem għandu jirrikonoxxi li l-kultura, il-kreattività u l-identità mhumiex biss punti ta’ saħħa – huma essenzjali għal futur b’saħħtu u kompetittiv. Mingħajr viżjoni fit-tul li tinkludi u tappoġġja s-settur kreattiv, Malta tirriskja li tibqa’ lura u li ma tisfruttax wieħed mill-aktar riżorsi prezzjużi u dinamiċi tagħha.
L-MEIA tibqa’ tħares ’il quddiem b’ottimiżmu li għad hemm żmien biex din l-inklużjoni ssir kemm permezz tal-konsultazzjoni pubblika kif ukoll bir-rikonoxximent tal-gvern.
