Raġel ġie kkundannat sentejn ħabs sospiżi għal erba’ snin wara li ammetta li ta daqqa f’wiċċ it-tfajla tiegħu u li pprova jagħti n-nar lill-karozza tagħha wara li hija ppruvat twaqqfu milli jieħu d-droga waqt li kien qed jipprepara biex jattendi programm ta’ riabilitazzjoni.
Ir-raġel ta’ 38 sena miż-Żejtun wieġeb ħati li weġġa’ ħafif lis-sieħba tiegħu, ġegħlha tibża’ minnu u pprova jqabbad il-karozza tagħha fil-25 ta’ Frar. Il-Maġistrat Kevan Azzopardi sema’ kif, fil-25 ta’ Frar, mara ressqet rapport fit-taqsima tal-Vjolenza Domestika tal-Pulizija.
Hija rrapportat lis-sieħeb tagħha, li kienet ilha miegħu 18-il sena. Huma kellhom żewġt itfal, ta’ 17 u seba’ snin. Il-mara qalet li s-sieħeb tagħha kien qed joqgħod fid-Dual Diagnosis Unit tal-Isptar Monte Karmeli hekk kif kien qed jipprepara biex jibda programm ta’ riabilitazzjoni mid-droga fl-20 ta’ Marzu.
Ċemplilha u qalilha li kien se jitlaq. Fl-24 ta’ Frar, il-koppja qattgħu l-ġurnata flimkien. L-għada, wara li telaqha, hija ma setgħetx tagħmel kuntatt miegħu. Eventwalment sabet li kien ma’ ħabib f’Birżebbuġa. Hija ssuspettat x’kien qed jiġri, u għalhekk saqet hemm. Meta waslet rat li kellu trab abjad fuq imnieħru.
Meta staqsietu jekk reġax ta għad-droga, taha daqqa ta’ ħarta. Saqu d-dar u, waqt li kien fil-garaxx, huwa pprova jagħti n-nar lill-karozza tagħha permezz ta’ ċilindru żgħir tal-gass tal-barbeque – dan ġara quddiem it-tifel tagħhom ta’ seba’ snin.
Il-maġistrat innota li l-akkużat ikkopera mal-Pulizija u li ffirma biex jibda programm ta’ riabilitazzjoni. Il-maġistrat ħareġ ordni ta’ protezzjoni li tipprojbixxih milli jersaq lejn il-mara. Il-maġistrat ħareġ ukoll ordni ta’ trattament ta’ tliet snin biex l-imputat jittratta l-programm tiegħu dwar il-vizzju.
Ladarba dan ikun ġie ordnat mill-Qorti issa, l-akkużat jiffaċċja konsegwenzi legali jekk jitlaq mill-programm ta’ riabilitazzjoni. L-ismijiet mhux qed jiġu ppubblikati biex jipproteġu lill-vittma.
L-avukati tal-AĠ Valentina Cassar u Joseph Camilleri mexxew il-prosekuzzjoni mal-Ispettur tal-Pulizija Audrey Micallef. L-Avukat Silvan Pulis irrappreżenta lill-akkużat.
