Avveniment uniku ta’ fitness fil-beraħ se jsir f’Golden Bay nhar il-Ħadd, 16 ta’ Marzu, u se jgħaqqad flimkien il-komunitajiet tar-running, yoga u sports fuq il-bajja għal filgħodu attiv ħdejn il-baħar, kollu b’risq ir-Richmond Foundation.
L-avveniment b’xejn ‘RUN, FLOW, & PLAY’ joffri lill-parteċipanti l-għażla bejn ġirja panoramika ta’ 4.5km fuq trail jew sessjoni ta’ yoga gwidata fuq il-bajja pittoreska. Il-ġirjiet se jsiru fi gruppi bbażati fuq il-pass ta’ kull individwu, biex ikun hemm esperjenza inklużiva għal kull livell ta’ fitness, filwaqt li dawk li jagħmlu yoga huma mħeġġa jġibu l-mata tagħhom biex igawdu s-sessjoni ħdejn il-baħar.
Wara l-ġirja u s-sessjoni ta’ yoga, il-parteċipanti jistgħu jgawdu xi xarbiet, jissoċjalizzaw, jieħdu sehem f’logħba ta’ volleyball fuq il-bajja, jew saħansitra jagħmlu għawma!
“Dan l-avveniment huwa dwar li nġibu lin-nies flimkien permezz tal-moviment, in-natura u l-ispirtu komunitarju,” qal Matthias, l-organizzatur ta’ Sunday Run Club Malta. “Kemm jekk int ġerrej/a b’esperjenza, persuna li tipprattika l-yoga, jew sempliċement trid tipprova xi ħaġa ġdida, inħeġġuk tingħaqad magħna għal filgħodu ta’ gost u fitness, filwaqt li nappoġġjaw is-saħħa mentali.”
L-avveniment huwa b’xejn, iżda wieħed irid jirreġistra permezz ta’ https://www.sundayrunclubmalta.com/events.
Donazzjonijiet lir-Richmond Foundation, li tipprovdi servizzi essenzjali ta’ appoġġ għas-saħħa mentali f’Malta, huma mħeġġa.
