Il-Kummissjoni Ewropea qed tniedi l-edizzjoni tal-2026 tal-kompetizzjonijiet tal-Kapitali Ewropea tat-Turiżmu Intelliġenti u tal-Pijunier Ekoloġiku Ewropew tat-Turiżmu Intelliġenti. Id-destinazzjonijiet turistiċi madwar l-Ewropa huma mistiedna jissottomettu l-prattiki innovattivi tat-turiżmu intelliġenti u sostenibbli tagħhom biex isiru eżempji ewlenin fit-turiżmu Ewropew.
Bħala waħda mill-akbar ekosistema tal-UE, it-turiżmu għandu rwol kruċjali fit-tkabbir ekonomiku u l-ħolqien tal-impjiegi. L-inizjattiva tat-Turiżmu Intelliġenti tirrikonoxxi bliet li jimplimentaw għodod u prattiki diġitali ġodda bħall-opportunitajiet indaqs u l-aċċess għall-viżitaturi, l-iżvilupp sostenibbli u l-appoġġ lill-industriji kreattivi u lit-talent lokali.
B’dawn il-kompetizzjonijiet, il-Kummissjoni Ewropea tippromwovi u tippremja l-futur tat-turiżmu intelliġenti u sostenibbli fl-Ewropa.
Sabiex jikkompetu għat-titli tal-2026, il-bliet jintalbu juru l-prattiki innovattivi tat-turiżmu tagħhom u jissottomettu l-applikazzjonijiet tagħhom bl-użu ta’ formola online. L-applikazzjonijiet l-ewwel se jiġu evalwati minn bord ta’ esperti indipendenti. Fit-tieni pass, il-bliet fil-lista l-qasira se jintalbu jippreżentaw il-kandidtura tal-belt tagħhom quddiem il-Ġurija Ewropea. Il-Ġurija Ewropea se tagħżel żewġ rebbieħa, il-’Kapitali Ewropea tat-Turiżmu Intelliġenti 2026’ u l-’Pijunier Ekoloġiku Ewropew tat-Turiżmu Intelliġenti 2026’, li se jitħabbru f’Novembru 2025.
Iż-żewġ kompetizzjonijiet huma miftuħin kemm għall-bliet fl-UE, kif ukoll għall-pajjiżi mhux tal-UE li jieħdu sehem fil-Programm tas-Suq Uniku (SMP) – li qabel kien magħruf bħala l-Programm COSME. Il-pajjiżi eliġibbli jinkludu s-27 Stat Membru tal-UE u l-pajjiżi mhux tal-UE li qed jipparteċipaw fl-SMP, inklużi l-Albanija, il-Bożnja u Ħerzegovina, l-Iżlanda, il-Kosovo[1], il-Liechtenstein, il-Moldova, il-Montenegro, il-Maċedonja ta’ Fuq, in-Norveġja, is-Serbja, it-Türkiye, u l-Ukrajna.
