Il-PBS ikkonferma li f’dawn il-jiem għaddejin diskussjonijiet mal-kantanta Miriana Conte sabiex isiru “tibdiliet minimi” fil-kanzunetta ‘Kant’ li rebħet il-Malta Eurovision. Dan minħabba l-fatt li l-EBU iċċensura din il-kelma u allura, il-kanzunetta se jkollha tiġi emendata.
Il-Kap Eżekuttiv tal-PBS Keith Chetcuti stqarr li l-kanzunetta rebbieħa tal-Malta Eurovision Song Contest, trid tkun hi li tipparteċipa. U għalhekk, il-PBS jinsab f’diskussjonijiet mal-artista u l-awturi tal-kanzunetta biex jaraw x’tibdiliet minimi jistgħu jsiru biex jagħmluha aċċettabbli għall-EBU. U b’hekk tiġi aċċettata għall-Eurovision li se jsir f’Basel.
Qed jingħad li dawn l-emendi mhu se jkunu qed ibiddlu xejn partikolari mill-kanzunetta li rebħet il-Malta Eurovision – kanzunetta li fi kliem is-CEO tal-PBS, tant kisbet popolarità fl-istat preżenti tagħha.
