L-avukati li qed jiddefendu tnejn mill-erba’ irġiel akkużati bl-omiċidju involontarju ta’ ħaddiem tal-kostruzzjoni Albaniż qalu lill-qorti l-Ġimgħa li l-akkużati ma kellhomx il-“kompetenza teknika” biex jikkontrollaw il-kollass tal-bini. Madankollu raġel li weġġaż mal-kollass spjega fil-Qorti kif ma ħassux sigur fuq is-sit.
Bari Balla, ħaddiem tal-kostruzzjoni u missier ta’ sitt itfal, miet f’April tas-sena l-oħra meta s-saqaf ta’ proprjetà tas-Sliema fi Triq Sant’Injazju, waqa’ waqt li kien qed jaħdem taħt il-binja. Ir-raġel ta’ bintu, Genti Prodani ta’ 31 sena, li kien qed jaħdem ukoll fuq il-post, sofra ġrieħi fil-kollass.
Il-kuntratturi Kurt Galea ta’ 33 sena u Anthony James Fisher ta’ 42 sena, kif ukoll id-diretturi tal-kumpanija li kienet proprjetarja tal-binja -Oratorian Capital Ltd, Luca Micelli Demajo ta’ 33 sena u Samuel Borg ta’ 34 sena, ilkoll qed jiġu akkużati b’omiċidju involontarju u ksur tas-sigurtà.
L-erbgħa qed iwieġbu mhux ħatja. L-avukati difensuri li jirrappreżentaw lil Borg u Miceli Demajo argumentaw li r-rapport tal-esperti tekniċi tal-qorti eskluda r-responsabbiltà tad-diretturi għall-inċident. L-Avukat Joe Giglio qal li r-rapport irrakkomanda li l-persuna li trid twieġeb għal omiċidju involontarju tiġi mill-“parte civile”.
Minn naħa tiegħu, l-avukat Charles Mercieca qal li “m’hemm l-ebda prova ta’ ħtija” min-naħa tad-diretturi, u żied li skont ir-rapport, ir-raġuni wara l-avveniment kienet l-użu ta’ jigger żgħir fuq is-sit tal-kostruzzjoni.
Qal li r-rapport innota kif id-diretturi ma kellhom l-ebda “kompetenza teknika” biex jikkontrollaw l-inċident. L-iżviluppatur u l-perit kisbu permess ta’ ppjanar biex iżidu art imnaqqsa u jestendu dawk eżistenti.
Madankollu, il-permess iddikjara li l-ebda xogħol ma seta’ jibda sakemm il-perjodu li fih l-oġġezzjonaturi setgħu jappellaw id-deċiżjoni jkun skada. Dawk li joġġezzjonaw ikollhom 30 jum biex jippreżentaw appell kontra deċiżjoni ta ‘ppjanar.
Kemm l-Awtorità tal-Bini u l-Kostruzzjoni (BCA) kif ukoll l-Awtorità tas-Saħħa u s-Sigurtà fuq il-Post tax-Xogħol (OHSA) qalu li ma ġewx notifikati dwar ix-xogħol fuq is-sit. Mercieca kien ċar fl-argument tiegħu li t-tort ma waqax fuq id-direttur u ma kien hemm xejn li jorbot lil Demajo u Borg mal-mewt ta’ Balla.
Qal li n-nuqqas ta’ notifika lill-awtoritajiet lanqas ma kellu x’jaqsam mal-inċident. “Immaġina li xi ħadd jiekol f’ristorant u jifga bl-ikel, jekk id-diretturi tar-ristorant jitressqux il-Qorti,” staqsa Mercieca lill-Qorti. Meta kien qed jixhed quddiem il-maġistrat Ann Marie Thake, Prodani daħal fid-dettall dwar dak li ġara qabel l-inċident.
Ir-raġel ta’ bint il-vittma wissa’ lill-kuntrattur li “l-istruttura ma kinitx tidher “b’saħħitha”
Huwa qal li waqt żjara fuq il-post jiem qabel l-inċident, kien qal lill-kuntrattur Tony Fisher kif ma ħassux sigur fuq is-sit peress li l-istruttura ma kinitx tidher “b’saħħitha biżżejjed”. Qal li fit-18 ta’ April bagħat ritratti liż-żewġ kuntratturi u qalilhom li s-sit ma kienx sigur.
Qal li kemm Fisher kif ukoll Galea qalu li s-sit kien tajjeb biex jaħdem fuqu. Fakkar kif dakinhar tal-inċident, ħa ritratti biex jibgħat lil Fisher biex juri x-xogħol li kien sar. Qal li Tony kien maħsub li jżur is-sit iżda fl-aħħar ma deherx.
Kompla li kien qed jaħdem b’ jigger żgħir u kien qed jiġbor it-trab tal-kostruzzjoni f’barmil. F’ħin minnhom ħass “trab” nieżel fuqu. “Żewġ sekondi wara. spiċċa miksi. “Ma nafx kif irnexxieli noħroġ hekk kif weġġajt sew. Meta ħriġt ħadt ritratti ta’ dak li ġara. Tant kelli wġigħ, kull pass li għamilt, bdejt naqa’,” huwa qal.
Huwa pprovda kopji tar-ritratti lill-qorti. Prodani ttieħed l-isptar fejn qal li rċieva telefonata mingħand Fisher li nfurmah li Balla kien miet. Prodani qal li dik kienet l-aħħar telefonata li rċieva mingħand il-kuntratturi. Qal wkoll li Galea kien imblokkah mill-midja soċjali.
Meta mistoqsi jiddeskrivi lil Balla, huwa qal li kien ħaddiem bieżel u dejjem ħadem f’siti tal-kostruzzjoni. Waqt il-kontro-eżami, l-avukat difensur Stefano Filletti talab lil Prodani biex jiċċara jekk kienx qed juża l-gaffa matul il-ħin tal-inċident.
Filletti qal waqt l-inkjesta, Prodani qal li ma kienx qed juża l-jigger meta waqa’ l-ħajt. Prodani kkonferma li kellu l-jigger f’idejh meta s-saqaf waqa’ fuqu. L-Avukat Stefano Filetti qed jirrappreżenta lill-kuntratturi. L-Avukat Charles Mercieca irrappreżenta lil Samuel Borg. L-avukati Michael Grech, Joe Giglio u Michaela Giglio qed jidhru għa;l Luca Miceli Demajo. L-Avukati Ettienne Savona u Manuel Grech mill-uffiċju tal-Avukat Ġenerali qed imexxu l-prosekuzzjoni. Il-każ ikompli fit-18 ta’ Marzu.
