Baħħara Maltin juru l-ħiliet fil-Yachting Malta BSC International Regatta

Il-Yachting Malta BSC International Regatta, ta’ Birżebbuġa Sailing Club, intemmet nhar it-Tlieta waranofsinhar, wara erbat ijiem ta’ tlielaq intensivi f’diversi kundizzjonijiet. It-temp li kien qiegħed jinbidel kontinwament żamm lill-kumitat tat-tellieqa impenjat biex jassigura li t-tlielaq setgħu jsiru skond il-programm kif maħsub, b’mod sigur u bl-inqas tfixkil.

Minkejja li l-kundizzjonijiet kienu qed jinbidlu ta’ spiss, il-flotta tal-Yachting Malta BSC International Regatta rnexxielha tlesti numru ta’ tlielaq matul l-erbat ijiem għalkemm kien hemm ħtieġa li jsir tibdil fl-iskeda u l-korsa. L-ewwel jum offra kundizzjonijiet ideali b’riħ medju mix-Xlokk u b’imbatt moderat fl-inħawi ta’ Xrobb l-Għaġin.  Dan ħalla li jsiru tliet tlielaq għal kull klassi, minkejja xi sfidi inizjali biex id-dgħajsa tal-kumitat tat-tellieqa jirnexxielha tankra sew.

Fit-tieni jum, l-irjieħ inbidlu għal-Lvant u mewġ ta’ żewġ metri barra l-port għamluha impossibbli li jsiru t-tlielaq. Għaldaqstant, kien deċiż li t-tlielaq isiru fil-port grazzi għal koordinazzjoni effiċjenti mal-pilota tal-Malta Freeport. Dan ippermetta li l-klabb iżomm żewġ tlielaq konsekuttivi fuq korsa favur u kontra r-riħ (windward-leeward). Fit-tielet jum, irjieħ qawwija mill-grigal u l-mewġ b’saħħtu matul il-kosta ġiegħlu l-flotta tirritorna fil-port, fejn il-parteċipanti fil-klassijiet ILCA u l-Optimist setgħu jikkompetu fi tlielaq konsekuttivi.

Fl-aħħar jum l-irjieħ kienu iktar ħfief, b’veloċità ta’ bejn sitta u seba’ mili nawtiċi fis-siegħa.  Dan kien biżżejjed biex il-flotta toħroġ barra l-port għal żewġ tlielaq finali f’kundizzjonijiet li raw imbatt kemxejn imċaqlaq.

Ir-riżultati wara l-ewwel jum kienu diġà taw ħjiel ta’ kif kienet ser tkun il-klassifika finali, b’baħħara Maltin jiddominaw il-podju. Ħafna mir-rebbieħa stabbilew il-vantaġġ tagħhom mill-ewwel jum u żammew l-istatus tagħhom matul il-kompetizzjoni kollha.

Il-Commodore tal-Birżebbugia Sailing Club, Mario Aquilina, esprima s-sodisfazzjon tiegħu bir-riżultat tal-avveniment, u nnota mhux biss il-prestazzjoni b’saħħitha mill-baħħara Maltin, iżda wkoll l-attrazzjoni dejjem tikber lejn din ir-Regatta. Ir-Regatta, li issa tinsab fil-ħames edizzjoni tagħha, baqgħet tiġbed numru tajjeb ta’ parteċipanti barranin lejn l-ibħra Maltin.

Iċ-ċerimonja tal-Għoti tal-Premjijiet saret fil-Club fil-preżenza ta’l-Onorevoli’ Chris Bonett, Ministru għat-Trasport, l-Infrastruttura u x-Xogħlijiet Pubbliċi, is-CEO ta’ Yachting Malta Michael Mifsud, kif ukoll is-Sindku ta’ Birżebbuġa Scott Camilleri flimkien mal-Kunsillieri Alexander Caruana u Darren Debono.

Il-Birżebbuġa Sailing Club esprima l-gratitudni tiegħu lil Yachting Malta, Visit Malta, RLR Yachting, il-Kunsill Lokali ta’ Birżebbuġa, u l-Malta Freeport Pilots għas-sostenn imprezzabbli tagħhom matul l-avveniment. Kien hemm ukoll apprezzament għall-voluntiera ddedikati li kienu ilhom jaħdmu bla heda għal ġimgħat sħaħ biex jassiguraw li din ir-Regatta tkun waħda ta’ suċċess, kif ukoll għall-Uffiċjali tat-Tlielaq u l-Membri tal-Ġurija.

Il-Yachting Malta BSC International Regatta saret taħt l-awspiċji tal-Malta Sailing Federation.

Riżultati tal-Yachting Malta BSC International Regatta

ILCA 4

ILCA 6

ILCA 7

Optimist Senior

Optimist Novice

Optimist Cadet