Raġel ta’ 58 sena li qed jiffaċċja akkużi li weġġa’ serjament lil ibnu wara li tah daqqa ta’ ponn f’wiċċu, ingħata l-libertà proviżorja mill-Qorti l-Erbgħa waranofsinhar. Ir-raġel min-Naxxar ġie akkużat li weġġa’ gravi lil ibnu waqt argument li nqala’ nhar it-Tnejn filgħodu fil-Pjazza tal-Imġarr.
Huwa kien akkużat ukoll li kiser il-paċi. Huwa mifhum li ibnu spiċċa b’xi punti f’wiċċu. L-akkużat tressaq quddiem il-Maġistrat Donatella Frendo Dimech fejn wieġeb mhux ħati tal-akkużi, filwaqt li argumenta li kien qed jiddefendi lilu nnifsu.
Il-Qorti laqgħet it-talba għal-libertà proviżorja kontra depożitu ta’ €5,000 u garanzija personali ta’ €5,000.
Il-Qorti ħarġet ukoll ordni ta’ protezzjoni favur il-vittma.
L-Ispettur Audrey Micallef mexxiet il-prosekuzzjoni. Għall-akkużat dehru l-avukati Jason Grima, Kirsty Muscat u Oscar Gauci-Maistre.
