Għalliema nhar il-Ġimgħa kienet akkużata b’ħasil ta’ flus talli qasmet kont bankarju mas-sieħeb tagħha li qed jiġi mixli bit-traffikar tad-droga fuq il-dark web. Is-sieħeb tagħha qed jiffaċċja aktar minn 20 akkuża marbuta ma’ ħasil ta’ flus, frodi, bejgħ ta’ flus foloz, prodotti foloz u tagħmir tal-pulizija.
L-għalliema ta’ 25 sena, li isimha ġie pprojbit b’ordni tal-qorti minħabba l-professjoni tagħha wieġbet mhux ħatja għall-akkużi. Sorsi qalu li l-koppja użat il-kont konġunt biex tħallas is-self tad-dar tagħhom. Is-sieħeb tal-mara allegatament iddepożita flus minn bejgħ illeċitu fil-kont kondiviż tagħhom.
Minħabba f’hekk, il-mara ġiet akkużata b’kompliċità f’ħasil ta’ flus. Il-qorti ħarġet ordni ta’ ffriżar fil-konfront tagħha u kkonfiskat l-assi kollha tagħha. L-Avukat Alessia Schembri mill-uffiċċju tal-Avukat Ġenerali u l-Ispettur Yvette Borg Cardona mexxew il-prosekuzzjoni. L-avukati difensuri José Herrera u Martina Herrera rrappreżentaw lill-akkużata.
