“Irridu nirbħu l-qlub tan-nies”
Hekk stqarr is-Segretarju Ġenerali l-ġdid tal-Partit Nazzjonalista Charles Bonello, meta kien intervistat fuq Net FM minn Dione Borg..fejn spjega illi huwa determinat li l-Partit Nazzjonalista jkompli jirbaħ il-qlub tan-nies, u jiżra’ t-tama fost il-poplu.
Charles Bonello spjega illi l-aqwa missjoni ta’ partit politiku hija li jgħin lin-nies.
U dan se jkun qed isir billi l-Partit Nazzjonalista jħabbat l-bibien u jisma’ l-weġgħat tan-nies, permezz tal-uffiċjali, il-kandidati u dawk kollha li jimmilitaw fil-PN.
Is-Segretarju Ġenerali tal-PN spjega wkoll kif l-ewwel prijoritajiet tiegħu, f’din il-kariga ġdida, se jkun li jibda t-tiġdid fl-istrutturi interni tal-Partit Nazzjonalista.
Intant, aktar tard matul il-jum, Charles Bonello reġa’ kien mistieden kemm fuq Net TV u anke fuq Net FM. Fejn stqarr illi l-kariga ta’ Segretarju Ġenerali tirrikjeda ħafna xogħol – bl-appell illi pajjiżna ħaqqu bidla radikali sabiex jimxi ‘l quddiem.
B’Charles Bonello jispjega li l-Partit Nazzjonalista fil-Gvern huwa li se jipprovdi ekonomija, reputazzjoni u governanza nadifa, trasparenti u li ssarraf f’ġid għall-poplu Malti u Għawdxi.
Dan filwaqt li flimkien mal-Kap tal-PN Bernard Grech żaru l-aħħar preparamenti li qed isiru għall-maratona ġbir ta’ fondi organizzata mill-PN.
Hawn, sar appell sabiex nhar il-Ħadd, kulħadd jingħaqad mal-Partit Nazzjonalista għal din l-inizjattiva ta’ ġbir ta’ fondi li se tkun qed tgħin lill-PN jissaħħaħ u jkompli bil-ħidma tiegħu.
