Il-President Ukren, Volodymyr Zelensky, akkuża lir-Russja b’li qed tqarraq, fost l-indikazzjonijiet minn Moska li tista’ qed tikkunsidra waqfien mill-gwerra mal-Ukrajna – anki għal żmien temporanju.
U skont Zelensky, ir-reġim ta’ Vladimir Putin xorta qed jaħseb biex iġib pajjiżu għarkupptejh; bil-qawwiet tar-Russja, fl-aħħar sigħat, ikomplu bl-attakki fuq iz-zoni ċivili tal-Ukreni.
Zelensky, li kien qed jitkellem wara l-aħħar telefonata bejn il-President tar-Russja u l-President Amerikan, Donald Trump, qal li l-wiegħdi ta’ Putin jistunaw mar-realtà.
Fil-fatt, ir-Russi, matul il-lejl tat-Tlieta, komplew jattakkaw il-faċilitajiet tal-Ukreni għall-ġenerazzjoni tal-enerġija. Attakki li komplew minkejja l-wiegħda dikjarata ta’ Putin biex jevita dawn il-miri għal massimu ta’ 30 jum.
Sadanittant, il-Ministeru tad-Difiża Russu akkuża lill-qawwiet Ukreni dwar attakk speċifiku fuq faċilità għall-ħażna taż-żejt fir-Russja u li skont Moska kien ‘att provokattiv biex iqanqal reazzjoni li turi pajjiżha f’dawl ħażin’.
Hu minnu wkoll li Vladimir Putin, waqt it-telefonata ma’ Trump, ċaħad għal waqfien mill-ġlied totali għall-gwerra mal-Ukrajna li ilha għaddejja minn Frar tal-2022.
Sadanittant, u minkejja l-avviċinament tal-aħħar jiem bejn Trump u Putin, xi osservaturi jemmnu li l-Mexxej Amerikan, bil-mod il-mod, jista’ qed jitlef is-sabar mal-Mexxej Russu.
Dan għaliex Putin mhux qed jidher lest għal konċessjonijiet sinifikanti biex il-gwerra tintemm u meta t-tmexxija ta’ Washington qed tinsisti għall-konklużjoni tal-konflitt li rriżultat f’wisq telf ta’ ħajja fost il-ħela ta’ finanzi u riżorsi.
L-aħħar rapporti mill-Istati Uniti, fl-istess ħin, sostnew li t-taħditiet dwar l-Ukrajna għandhom ikomplu nhar il-Ħadd li ġej.
Fil-preżent, il-pajjiżi tal-Punent qed jippruvaw jinterpretaw jekk hemmx xi messaġġ partikulari wara l-aħħar attakki mill-qawwiet Russi fuq l-Ukrajna – attakki li seħħew ftit sigħat biss wara d-diskursata telefonika bejn Putin u Trump.
Dan meta kien ukoll ikkonfermat li żewġ bini ta’ sptar fir-reġjun Ukren ta’ Sumy intlaqtu direttament mid-drones tar-Russja – u fejn ma ngħatawx dettalji dwar il-vittmi potenzjali.
