Raġel li kien fis-sakra u aggressiv ġie kkundannat 18-il xahar ħabs mill-Maġistrat Rachel Montebello wara li ammetta li f’Jannar li għadda, matul il-lejl ta n-nar ċilindru tal-gass, f’dak li l-prosekuturi ddeskrivew bħala attentat biex jinħaraq il-blokk ta’ appartamenti fejn kien jirrisiedi.
Bubakar Kandeh, ħaddiem ta’ ristorant ta’ 27 sena mill-Gambja, ammetta l-akkużi li ppreżentaw fil-Qorti l-Ispettur Clayton Camilleri u l-prosekutur Joseph Camilleri Azarov mill-Uffiċċju tal-Avukat Ġenerali, wara li dawn fi Frar li għadda akkużaw lil Kandeh b’attentat ta’ ħruq, li wassal biex persuni oħrajn jibżgħu li se tintuża l-vjolenza kontrihom, li għamel storbju qawwi matul il-lejl u li kien fis-sakra u ma kienx kapaċi jieħu ħsieb tiegħu nniffsu f’post pubbliku.
Huwa kien mixli wkoll li attakka lil persuni oħra bil-ħsieb li jdejjaqhom jew jagħmlilhom il-ħsara, li wettaq insulti jew theddid u li kkawża ħsara kriminali. L-Ispettur tal-Pulizija spjega li matul il-lejl tat-30 ta’ Jannar, l-Għassa ta’ Birkirkara kienet irċeviet rapport li raġel ta’ karnaġġon skur, kien qed jirremetti d-demm u deher fis-sakra, filwaqt li kien għaddej madwar zona komuni fil-blokk ta’ appartamenti fejn kien joqgħod.
Hu beda jħabbat il-bibien tal-ġirien tiegħu waqt li deher eċitat. Ir-raġel kien ta n-nar ukoll ċilindru li kien fih gass propan, qal l-Ispettur. Uffiċjali tal-pulizija kienu qabdu lil Kandeh, u ħaduh direttament l-isptar għall-kura.
Huwa ġie arrestat malli ġie lliċenzjat mill-isptar. Fil-Qorti ngħad li hu kien ikkopera mal-Pulizija u ta stqarrija dwar l-inċident, li matulu kien assistit minn avukat. Il-Qorti tat struzzjonijiet lill-avukat Brandon Kirk Muscat biex jirrappreżenta lill-imputat bħala avukat tal-għajnuna legali għall-finijiet tal-akkużi, biex jieħu post kollega tiegħu li ma setax ikun preżenti għas-seduta.
Meta tressaq ix-xahar li għadda d-difiża f’isem il-klijent tagħha wieġbet mhux ħati għall-akkużi dedotti kontrih flimkien ma’ talba għal libertà proviżorja u rapport soċjali. Kollox indika li l-inċident kien reat ta’ darba mill-imputat li kellu rekord kriminali nadif, kien sostna Dr. Muscat.
Camilleri Azarov, għall-prosekuzzjoni kien oġġezzjona għall-ħelsien mill-arrest. L-avukat fakkar lill-Qorti li l-imputat kien “ipprova jaħraq blokk ta’ appartamenti bin-nies ġewwa fih.” Ir-riskju ta’ ħarba minn Malta ma kienx banali, sostna l-avukat, għaliex l-indirizz mogħti mill-imputat kien l-istess wieħed li kien ipprova jqabbad.
Is-sidien tal-flat ma riduhx jibqa’ hemm aktar, żied jgħid il-prosekutur, filwaqt li enfasizza wkoll ir-riskju li Kandeh jaħrab jew ibagħbas l-evidenza. Il-Qorti, wara li semgħet l-argumenti miż-żewġ naħat u wara li ħadet inkunsiderazzjoni ċ-ċirkostanzi tal-każ, f’dan l-istadju ċaħdet il-libertà proviżorja, minħabba n-natura tal-akkużi u r-riskju li jintilfu l-provi.
Il-Qorti kienet ċaħditlu t-talba għall-pleġġ. Wara li bdiet il-kumpilazzjoni l-akkużati ddeċieda li jammetti l-akkużi. Fis-sentenza tagħha l-Qorti qieset il-fatt li l-akkużat huwa mixli bl-attentat reat aktar milli r-reat ikkunsmat ta’ ħruq.
L-evidenza hija inekwivoka fis-sens li l-akkużat qabbad in-nar ġewwa l-bini bil-ħsieb li dan jinħaraq. Madankollu dan in-nar ma wassalx biex il-bini ħa n-nar minħabba kawża li kienet indipendenti mir-rieda tiegħu, jiġifieri, in-nar kien żgħir wisq għall-iskop maħsub u naqas milli jinfirex.
Fiċ-ċirkostanzi tal-każ, fejn dan deher li l-imputat kien qed ifittex l-għajnuna iddisprata peress li kien qed iħossu ma jiflaħx minkejja li dan kien minħabba xi forma ta’ intossikazzjoni, il-fatt li ħadd ma wieġeb għalih is-sejħa tiegħu għall-għajnuna u l-fatt li kien ukoll raġel rispettat mal-ġirien fil-blokk appartamenti, il-piena titnaqqas skont il-liġi, b’żewġ gradi, filwaqt li wieħed iżomm f’moħħu wkoll il-kondotta nadifa tiegħu.
Il-Qorti qalet li skont l-artikolu 533 tal-Kodiċi Kriminali, tordna lill-ħati jħallas lill-Reġistratur tal-Qorti s-somma totali ta’ €1,007 li tirrappreżenta l-ammont tax-xogħol ta’ esperti fil-proċedimenti, fi żmien sitt
xhur.
Il-Qorti ddikjarat ukoll li għall-finijiet tal-artiklu 383 tal-Kodiċi Kriminali u minbarra l-piena u sabiex jipprovdu għas-sigurtà tal-individwi li jgħixu fihom ġewwa Victoria Flats, Triq Dun Xand Cortis, Birkirkara, u għaż-żamma tal-paċi pubblika, jeħtieġ li l-ħati jidħol fir-rikonoxximent tiegħu stess jagħmel tajjeb b’somma ta’ €1,000 li trid titħallas f’perjodu ta’ 12-il xahar.
