Il-Kap tal-Oppożizzjoni Bernard Grech ta l-awguri mill-qalb lil Dun Fabio Attard wara l-elezzjoni tiegħu bħala Rettur Maġġur tal-Kongregazzjoni Salesjana. Fi stqarrija maħruġa aktar kmieni fuq l-midja soċjali, il-Kap tal-Oppożizzjoni esprima l-kburija immensa li jara qassis Malti jieħu rwol globali daqshekk prestiġjuż fi ħdan l-Ordni Salesjana.
Ftit wara l-elezzjoni ta’ Dun Fabio, il-Kap tal-Oppożizzjoni awgura personalment lil Dun Fabio permezz ta’ telefonata biex joffri l-isbaħ xewqat tiegħu. Huwa faħħar l-impenn ta’ Dun Fabio tul il-ħajja għall-missjoni Salesjana, filwaqt li enfasizza d-dedikazzjoni tiegħu għall-edukazzjoni, il-ħidma maż-żgħażagħ, u s-servizz reliġjuż. “Din il-ħatra ta’ qassis ieħor mill-Gżejjer Maltin fit-tmexxija ta’ ordni reliġjuża importanti hija unur kbir għal pajjiżna, il-Knisja Maltija, u l-poplu Għawdxi u Malti kollu,” irrimarka l-Kap tal-Oppożizzjoni.
L-elezzjoni ta’ Dun Fabio Attard bħala l-11-il suċċessur ta’ San Ġwann Bosco timmarka mument sinifikanti għas-Salesjani, hekk kif issa jieħu r-responsabbiltà li jmexxi l-kongregazzjoni madwar id-dinja. L-esperjenza estensiva tiegħu fil-ħidma pastorali, kemm lokalment kif ukoll internazzjonalment, kisbitlu rispett fost il-komunità Salesjana.
Il-Kap tal-Oppożizzjoni enfasizza li r-rwol il-ġdid ta’ Dun Fabio mhuwiex biss kisba personali iżda wkoll sors ta’ kburija nazzjonali. “Iċ-ċittadini Maltin u Għawdxin huma kburin ħafna li jaraw lil wieħed minnhom fdat b’pożizzjoni ta’ tmexxija tant vitali”.
