Eks Kuntistabbli tal-pulizija li kienet stazzjonata fl-Iskwadra ta’ Kontra d-Droga fi żmien li kienu arrestati tlett irġiel suspettati bi traffikar tad-droga, qalet lill-Qorti li ma tistax tiftakar dettalji relatati mal-każ peress li sofriet minn telf ta’ memorja. Il-każ imur lura għal Settembru 2008, meta t-tliet akkużati ġew arrestati wara s-sejba ta’ kunsinna sostanzjali ta’ ecstasy.
Carmen Gauci, telgħet biex tixhed fil-ġuri fil-konfront ta’ tlett irġiel allegatament involuti f’konfoffa ta’ traffikar ta’ droga, qalet li kienet telqet mill-Korp tal-Pulizija u ma setgħetx tiftakar eżatt meta seħħ dan kollu.
“Ma nistax niftakar eżattament meta,” qalet il-mara lill-Qorti, li żiedet li lanqas biss setgħet tiftakar min kien l-ispettur li kien fuq il-każ. Gauci spjegat li hija sofriet telf ta’ memorja minħabba “ċirkustanza personali”.
Rio Micallef mill-Marsa, David Tabone min-Naxxar, u Darren James Vella minn Birkirkara jinsabu mixlija b’diversi akkużi ta’ traffikar ta’ droga b’rabta ma’ kważi 2,000 pillola ecstacy. Huma qed iwieġbu mhux ħatja.
Il-Prosekutur Danika Vella staqsiet lil Gauci jekk tiftakarx li xehdet quddiem il-Qorti tal-Maġistrati, li wieġbet: “jekk hemm hekk fit-traskrizzjoni tax-xhieda tiegħi allura hekk hu.”
Ix-xhud intalbet toħroġ mill-awla. L-istess intalbu jagħmlu l-ġurati hekk kif il-prosekuzzjoni u d-difiża qajmu punt ta’ liġi. Il-prosekuzzjoni riedet taqra t-traskrizzjoni tax-xhieda tax-xhud lill-eks kuntistabbli, li l-prosekuzzjoni oġġezzjonat għaliha. Wara argument twil, il-Qorti ddeċidiet li x-xhieda ma tinqarax fil-Qorti.
L-Imħallef Edwina Grima ddeċidiet li Gauci għandha tixhed biss mill-memorja u ddeċidiet li l-ebda parti mix-xhieda ma għandha tinqara. Il-Qorti sostniet li l-prosekuzzjoni kienet taf sew bil-kwistjonijiet ta’ saħħa tax-xhud u ma ressqetx talba biex titlob li x-xhieda tagħha tinqara lill-ġurati.
Barra minn hekk, il-prosekuzzjoni ma wrietx li bix-xhieda kienet se ssofri aktar ħsara psikoloġika. Il-Prosekutur Godwin Cini esprima d-diżappunt tiegħu dwar id-deċiżjoni, u osserva li x-xhud kienet “kruċjali” għall-prosekuzzjoni, u staqsa jekk kinux “preklużi” għall-kontroll tax-xhud.
Meta tosserva li ċ-ċertifikati kellhom jiġu ppreżentati qabel ma beda l-ġuri, il-Qorti Kriminali qalet: “Tkun xi tkun li tiftakar, se tixhed fuqu. Diġà ddeċidejt fuq din il-kwistjoni.”
Hawn ix-xhud u l-ġurati ssejħu lura fl-awla. “Ma niftakar xejn. Ħdimt ma’ diversi spetturi,” qalet Gauci. Hekk kif il-ġurati ġew murija sett ta’ ritratti, ix-xhud ġiet mistoqsija jekk tistax tagħraf lil xi ħadd fir-ritratti. Hija lanqas ma għarfet lilha nnifisha fir-ritratti.
Intweriet ukoll il-borża s-sewda li Tabone kien qed iġorr fil-ħin tal-arrest.
“Ma niftakar xejn,” reġgħet qalet. “Tista’ tagħraf lil xi ħadd fl-awla?” Staqsiet l-Imħallef Edwina Grima. “Lanqas nista’ nirrikonoxxi l-avukati,” qalet il-mara.
Xehed ukoll l-espert maħtur mill-Qorti Godwin Sammut. Spjega li kien hemm total ta’ 1,940 pillola ecstasy li fihom varjat il-konċentrazzjoni tal-kompost kimiku. Spjega wkoll li skont ir-rapporti li ntużaw dak iż-żmien, kull pillola kienet tiswa €9.60.
Xhieda oħra kienu jinkludu żewġ nisa li ħadmu mal-HSBC u Vodafone rispettivament u li kienu ppreżentaw rapporti waqt il-proċeduri kriminali quddiem il-Qorti tal-Maġistrati.
Il-Prosekutur Danika Vella qrat ix-xhieda ta’ perit maħtur mill-Qorti biex ifassal il-pjanta taz-zona fejn saru l-arresti peress li x-xhud sarlu intervent kirurġiku. L-avukati Kevin Valletta, Godwin Cini u Danica Vella qed imexxu prosekuzzjoni f’isem l-Uffiċċju tal-Avukat Ġenerali.
Għal David Tabone qed jidhru l-avukati Arthur Azzopardi u Jacob Magri. L-avukati José Herrera u Alex Scerri Herrera qed jassistu lil Rio Micallef. L-Avukati Matthew Xuereb qed jassisti lil Darren James Vella flimkien mal-avukat Michael Sciriha.
