Marine Le Pen, il-protagonista u ‘bandiera’ tal-estremisti tal-lemin Franċiżi, spiċċat ipprojbita milli tikkuntesta għal kariga pubblika għal xejn anqas minn ħames snin…Żvilupp li jfisser li hi ma tistax tikkuntesta għall-elezzjonijiet presidenzjali li se jsiru fi Franza fl-2027.
Il-qorti sabet lil Le Pen, li tmexxi lill-Partit Rally Nazzjonali (RN), ħatja dwar il-misapproprjazzjoni u l-użu frodulenti tal-fondi mill-Ewropa biex tiffinanzja lill-istess partit taggħa. U d-deċiżjoni, bla dubju, hi daqqa ta’ ħarta kbira għall-estremisti tal-lemin Franċiżi li jopponu l-immigrazzjoni u li ilhom b’ambizzjonijiet biex imexxu Franza għall-ewwel darba fl-istorja.
Filwaqt li Le Pen kienet qed tistenna li tinstab ħatja dwar l-akkużi relatati mal-fondi, il-verdett kien xokk għaliha wkoll peress li qatt ma bassret li setgħet, effettivament, tispiċċa sospiża milli tikkuntesta elezzjoni għal daqstant fit-tul.
Marine Le Pen ingħatat ukoll sentenza ta’ erba’ snin ħabs,b’sentejn sospiżi, għalkemm mhux mistenni li hi, fil-fatt, tiskonta s-sentejn l-oħra ta’ priġunerija.
Intant, ix-xokk dwar is-sentenza u l-konsegwenzi kien espress ukoll fost il-protagonisti tal-politika estremista tal-lemin madwar l-Ewropa.
Geert Wilders, il-politiku Olandiż, kien l-ewwel li esprima appoġġ lil Le Pen fost il-kumment li hi għandha tirbaħ l-appell kontra s-sentenza, waqt li l-Prim Ministru Ungeriż, Viktor Orban, ukoll bagħatilha messaġġ ta’ solidarjetà .
Il-verdett lanqas ma niżel tajjeb fir-Russja, waqt li l-Viċi-Prim Ministru Taljan, Matteo Salvini, fisser is-sentenza ta’ Le Pen bħala ‘dikjarazzjoni ta’ gwerra minn Brussell’ filwaqt li sostna li verdetti bħal dawn mhumiex se jintimidaw lill-moviment radikali tal-lemin madwar l-Ewropa.
