F’temp mill-isbaħ, max-Xatt tal-Birgu, dalgħodu saret iċ-ċerimonja li fakkret l-għeluq tal-bażi militari Brittannika f’pajjiżna 46 sena ilu.
Il-marċ mill-Banda tal-Forzi Armati ta’ Malta beda fid-9:30am minn Pjazza Pawlino Vassallo f’Bormla sal-monument fil-Birgu, fejn il-Banda tal-Forzi Armati ta’ Malta flimkien mal-Gwardja tal-Unur laqgħu lill-ogħla awtoritajiet tal-pajjiż.
Iċ-ċerimonja laħqet il-qofol tagħha fl-10am fejn mal-wasla tal-President ingħatat salut nazzjonali.
Wara, l-ogħla awtoritajiet flimkien telgħu fuq il-monument, u ndaqqet il-fanfarra.
Id-deputat David Agius poġġa’ kuruna ta’ fjuri f’isem il-Kap tal-Oppożizzjoni Bernard Grech.
Fis-snin sebgħin il-Prim Ministru ta’ dak iż-żmien Dom Mintoff kien ġedded il-kuntratt mal-Ingliżi mill-1974 sal-1979 biex b’hekk Malta kompliet isservi bħala bażi militari. Iżda imbagħad, fil-31 ta’ Marzu tal-1979 telqu minn Malta l-aħħar bastimenti Ingliżi. U b’hekk Malta ma kinitx għadha bażi militari.
Il-programm ta’ din il-festa jkompli għada f’nofsinhar meta se ssir parata mill-Banda tal-Forzi Armati ta’ Malta fi Pjazza San Ġorġ, fil-Belt Valletta.
F’din il-wirja, il-Banda tal-Forzi Armati ta’ Malta mmexxija mill-Maġġur Jonathan Borg tesegwixxi numru ta’ kompożizzjonijiet lokali flimkien ma’ numru ta’ marċi li matulhom isiru diversi formazzjonijiet mill-istess membri tal-Banda tal-Forzi Armati ta’ Malta.
Ritratti: Catriel Farrugia Sghendo
