Colin Schembri
Depiro Blue 61
Hibernians 54
(10-10)(14-9)(14-25)(23-10)
F’partita li rat żewġ fażijiet kontrastanti, Depiro Blue kisbu rebħa importanti 61-54 kontra Hibernians fl-ewwel finali tal-kampjonat Pisani Motoring School tan-nisa taħt is-sittax-il sena. Minkejja li kienu minn taħt b’10 punti fit-tielet sessjoni, Depiro wieġbu b’mod deċiżiv fl-aħħar taqsima, fejn għamlu run ta’ 23-10 biex dawru l-logħba favurhom u temmew fuq nota pożittiva.
Il-konfront beda b’mod bilanċjat ħafna, b’żewġ timijiet li daħlu bl-istess intensità. L-ewwel sessjoni ntemmet 10-10 u anke fit-tieni waħda wara li ħadd ma rnexxielu jiftaħ distakk sinifikanti. Għalkemm Depiro kienu aktar effiċjenti taħt il-boards, speċjalment grazzi għar-rebounds ta’ Claire Portelli u Kirstie Sammut, kienu Hibs li daħlu għall-mistrieħ ftit minn fuq, 19-24.
It-tielet sessjoni kienet meqjusa bħala ta’ daqqa għal Depiro, hekk kif Hibernians ħarġu b’aktar saħħa u żiedu l-vantaġġ tagħhom għal massimu ta’ 10 punti wara run ta’ 12-2. Zaira Ahar u Alexa Sammut kienu kruċjali f’dan il-perjodu, flimkien ma’ Viktorija Dabic li kkontribwiet ukoll fil-rebounds.
Hibs daħlu fl-aħħar taqsima fuq vantaġġ ta’ 44-38 u dehru f’pożizzjoni komda. Madankollu, Depiro wieġbu b’mod mill-aqwa fl-aħħar sessjoni. Bi pressjoni għolja fuq il-ballun u kontroll tar-rebounds, bdew run ta’ 14-2 li għamlet il-partita mill-ġdid waħda miftuħa. Claire Portelli kienet f’forma eċċezzjonali, b’21 rebound u 18-il punt, filwaqt li Kirstie Sammut żiedet 24 punt f’wirja ta’ determinazzjoni u mexxejja. Din il-koppja ħadet il-logħba f’idejha, u Hibernians sabuha diffiċli biex jirrispondu taħt pressjoni.
Hibs sofrew telf ta’ pussess f’mumenti kruċjali, b’Depiro japprofittaw ukoll b’mod effiċjenti b’punti mill-offensive reboubts (19 kontra 11). Għalkemm Sammut u Ahar komplew jippruvaw iġibu reazzjoni, Depiro kienu aktar preċiżi u determinati fl-aħħar minuti, u b’hekk żammew il-vantaġġ sat-tisfira finali.
Depiro Blue: Ylenia Mangion 5, Claire Portelli 18, Kristie Sammut 24, Giulia Agius, Samira Deguara 2, Elinore Spiteri, Maya Borg 2, Chloe Chetcuti, Idara Etim Grech, Sarah Borg, Alexandra Ciurariu 10.
Hibernians: Lara Micallef 8, Elly Jovanovic 11, Bettina Demanuele, Dezaiya Abela, Kelly Sciberras, Zaira Ahar 11, Martina Muscat, Nikki Axiaq, Martina Mendez 5, Sara Cassar, Alexa Sammut 14, Viktorija Dabic 5.
Referees: Zvezdan Dobrosaviljevic, Andre Attard, Wendell Lim
