Il-President tal-Istati Uniti Donald Trump issa għamilha ċara li jinsab irrabjat ferm għall-aġir riġidu u intransiġenti tal-President Russu, Vladimir Putin, rigward il-gwerra fl-Ukrajna.
Dan meta Trump hu disprat biex iniżżel ismu fl-istorja bħala l-medjatur li rnexxielu jikkonkludi l-konflitt li ilu aktar minn tlett snin fl-artijiet tal-Ukreni…Sitwazzjoni skomda għall-President Amerikan peress li Putin – minkejja kliemu u l-avviċinament tal-aħħar jiem ma’ Washington — qed ikompli juru li mhux tassew dispost għall-paċi.
Trump jinsab partikularment urtat wara li Putin ikkritika d-dritt ta’ Volodymyr Zelensky biex ikun President tal-Ukrajna – bil-President Russu anki jissuġġerixxi biex il-Ġenerali Ukreni stess iwarrbuh lil Zelensky mit-tmexxija.
U jekk Putin ikompli jfixkel il-proċess lejn il-paċi. il-President Trump jinsab lest biex jimponi tariffi sekondarji u devastanti għall-industrija taż-żejt tar-Russja. Dan fost l-indikazzjonijiet li t-taħditiet għall-paċi fl-Ukrajna mhumiex mexjin fid-direzzjoni t-tajba.
Għalissa, Trump ma ħariġx jikkritika personalment lil Putin dwar il-gwerra fl-Ukrajna u wara li hu kien ċanfar bil-kbir lill-President Zelensky waqt il-famuża laqgħa ta’ jiem ilu mal-Mexxej Ukren fil-White House ta’ Washington.
Iżda jekk ir-Russja tibqa’ ma tiffirmax ftehim għall-paċi, Trump qed jhedded li jippersisti bit-tariffi għaż-żejt li jipproduċu r-Russi u li, effettivament, jipprojbixxi lill-kumpanniji milli jixtru dan iż-żejt..Dan bħala parti minn direttiva potenzjali fis-sens li kumpannija li tixtri ż-żejt mingħand ir-Russi ma tista’ tissieħeb fl-ebda negozju jew proġetti kummerċjali fl-Istati Uniti.
Trump u Putin, intant, qed jippreparaw għal aktar taħditiet din il-ġimgħa – bil-President Amerikan jindika li ‘il-Mexxej Russu wkoll jaf li Washington mhux kuntent biċ-ċirkustanzi.
It-theddid ta’ Trump jidher li qed iħasseb lir-Russja anki jekk Dmitry Peskov, bħala kelliem għall-Kremlin, ipprova jnaqqas mit-tensjoni fost il-kumment li r-Russja qed taħdem u tikkoordina flimkien mal-Istati Uniti biex ikun hemm il-paċi fl-Ukrajna. Kumment ieħor kien li Vladimir Putin qed jibqa’ dispost għall-kuntatti mal-President Amerikan.
Min-naħa tiegħu,Volodymyr Zelensky qed iwissi lill-Mexxejja tal-Punent li Putin mhux tassew irid iwaqqaf il-gwerra. Zelensky sostna li r-Russi qed jitnikkru apposta f’impenn biex l-Amerikani jibqgħu imwaħħlin f’taħditiet li ma jaslu mkien….Sitwazzjoni fejn il-Kremlin anki qed iressaq il-kundizzjonijet foloz bil-ħsieb li jirbaħ iż-żmien waqt li l-qawwiet Russi jaħtfu aktar artijiet fl-Ukrajna.
U llum, aktar uffiċjali f’Washington qed jemmnu li Vladimir Putin irid jinnegozja dwar il-kunċetti territorjali fl-Ukrajna minn pożizzjoni aktar b’saħħitha minn tal-preżent.
Fl-istess ħin, komplew, fl-aħħar sigħat, l-attakki mill-ajru tar-Russi fuq l-Ukrajna u meta d-difiżi tal-Ukreni f’Kharkiv, mill-ġdid, kellhom iwaqqgħu l-għexieren tad-drones sparati lejn il-komunitajiet ċivili.
