Jirriżulta li hemm 364 adult fuq il-lista ta’ stennija għal surgery fis-servizz tad-dentistrija fl-Isptar Mater Dei. Hemm ukoll 113-il tifla/tifel fuq il-lista ta’ stennija għal servizz tad-dentistrija fl-Isptar Mater Dei – b’kollox hemm jistennew 477 pazjent.
Dan kien ikkonfermat mill-Ministru Jo Etiienne Abela, il-Ministru għas-Saħħa u responsabbli minn Mater Dei meta kien mistoqsi fil-Parlament mid-Deputat Nazzjonalista Graziella Attard Previ. Hi staqsiet kemm hemm adulti u tfal fuq il-lista ta’ stennija għal servizz tad-dentistrija fl-Isptar Mater Dei.
Il-Ministru qal ukoll li biex il-perjodu tal-istennija jkompli jonqos, inbdew sessjonijiet ekstra filgħaxijiet u qed jiġu kkunsidrati sessjonijiet fil-Ħdud u fil-privat.
In-numru ta’ dawk l-adulti u tfal li qed jistennew għal surgery fis-servizz tad-dentistrija fl-Isptar Mater Dei tkompli tiżdied mal-lista ta’ stennija tal-pazjenti li qed jistennew xi servizz u li dejjem qed titwal fl-Isptar Mater Dei. Biżżejjed kuljum qed ikun hemm stennija twila biex pazjent jinqeda fl-Emerġenza tal-Isptar Mater Dei.
