Donald Trump se jħabbar aktar tariffi, bil-President jhedded li kapaċi joħloq gwerra kummerċjali globali; fil-ġurnata li hu sejjaħ bħala “jum il-ħelsien”
Minn meta ġie elett President tal-Istati Uniti, Donald Trump kompla jisħaq fuq l-importanza tal-produzzjoni lokali. Dan b’detriment qawwi fuq prodotti oħrajn li ġejjin minn barra l-Amerika.
Fl-aħħar xhur Trump iddikjara li jrid li l-Istati Uniti terġa’ lura għall-glorja tagħha fejn tidħol manifattura lokali – bi Trump jispiċċa jħabbar li ser jgħolli t-tariffi fuq prodotti li ġejjin minn barra l-Istati Uniti. B’mod speċjali b’tariffi ġodda fuq il-Kanada, Il-Messiku u anke l-Unjoni Ewropea. Dan apparti l-miżura ta’ tassazzjoni ta’ 25% fuq il-karozzi kollha importati.
Min naħa tiegħu, Donald Trump qal li dawn il-miżuri ser iqawwu d-dħul tal-Gvern Amerikan; apparti li ser tissaħħaħ il-manifattura Amerikana minn kull aspett.
Hu qed jibqa’ jgħid li l-Messiku u l-Kanada qed jabbużaw minn pajjiżu fejn jidħol kummerċ. Iżda apparti minn hekk, se jimponi wkoll tariffi iebsa sabiex titrażżan l-imigrazzjoni illegali mill-Messiku b’mod speċjali.
Intant bosta ekonomisti u politiċi demokratiċi qed ikomplu jisħqu li dawn il-miżuri ser jiżolaw l-Istati Uniti mill-kumplament tad-dinja – dan apparti li skont huma dawn il-miżuri ta’ tassassjoni radikali ser ikomplu jagħksu l-konsumatur u l-imprenditur Amerikan bil-pjaga tal-għoli tal-ħajja.
Bosta qed jitfgħu wkoll dawl fuq is-sitwazzjoni tas-swieq internazzjonali, fejn bħalissa jinsabu f’livelli baxxi minħabba l-inċertezza tal-impatt ta’ dawn il-miżuri.
Apparti min hekk dawn it-tariffi ġodda mistennija jolqtlu l-iktar il-Messiku, Il-Kanada, ir-Renju Uniti u anke l-Unjoni Ewropea b’mod speċjali – b’rapporti mill-Ingilterra jindikaw li dawn il-miżuri kapaċi jitfgħu f’riskju kbir mal-25,000 impjegat.
Intant, il-President tal-Istati Uniti ser ikun qiegħed iħabbar l-aħħar sett ta’ miżuri mill-White House, proprju fl-Oval Office – f’jum li Trump u l-amministrazzjoni tiegħu qed isejħu bħala Jum il-Ħelsien.
