L-iPhone ta’ Joseph Muscat ġie mħassar ġimgħat qabel mal-pulizija għamlu rejd fid-dar tiegħu. L-espert tal-Qorti Keith Cutajar xehed fil-Qorti li l-Eks Mexxej Laburista għamel darbtejn tfittxija fuq Google dwar kif wieħed iħassar backup chats fuq Whatsapp.
Keith Cutajar xehed ukoll li 35gb tad-data li tħassru ġew irkuprati. Is-softwer u l-irkupru tad-data mbagħad intuża biex tiġi rkuprata informazzjoni rilevanti oħra mħassra. Cutajar ippreżenta rapport fl-apparat ta’ Muscat bħala parti minn każ kriminali kontrih.
Muscat u diversi persuni oħrajn qed jiffaċċjaw akkużi ta’ ħasil ta’ flus, korruzzjoni, u tixħim b’rabta mal-ftehim frawdolenti tal-isptarijiet. Il-mobile ta’ Muscat ġie ‘reseted; fit-28 ta’ Diċembru 2021. Fid-19 ta’ Jannar, tliet ġimgħat wara, saret tfittxija fid-dar tal-familja Muscat f’Burmarrad.
Dakinhar Muscat kien irrifjuta li jagħti lill-investigaturi l-password tal-mobile tiegħu u f’Novembru Qorti semgħet li kienet se tieħu kważi sena biex jinfetaħ l-apparat. Bl-użu ta’ softwer speċjalizzat, l-espert tal-Qorti pprova l-kombinazzjonijiet kollha ta’ password possibbli biex jiftaħ it-telefon.
Is-softwer finalment kiseb aċċess wara li pprova l-PIN 227488, żvela Cutajar nhar l-Erbgħa quddiem il-Maġistrat Rachel Montebnello. Iżda meta l-espert tal-Qorti mar jeżamina l-kontenut tal-mobile, huwa skopra li kien ġie mnaddaf.
Dan kollu ħarġet meta kompliet il-kumpilazzjoni fil-konfront ta’ numru ta’ persuni fosthom l-Eks Prim Ministru Joseph Muscat, l-Eks Chief of Staff fl-Uffiċċju tal-Prim Ministru Keith Schembri u l-Eks Ministru Konrad Mizzi.
L-espert Keith Cutajar xehed li “f’Diċembru 2021, madwar xahar qabel it-tfittxija li saret fid-dar ta’ Joseph Muscat”, fejn qal li l-mobile tiegħu tħassritlu d-data kollha. Spjega li meta eżamina l-mobile ta’ Muscat, irriżulta li sarlu proċess ta’ ‘wiping’, proċess li qal isir manwalment, li jikkonsisti wkoll fi tħassir tal-‘applications’ u l-files kollha.
L-espert Cutajar sostna li rnexxielu jirkupra 35GB minn dak li tħassar, il-massimu li t-teknoloġija tagħti biex jittella’ l-materjal mill-ġdid. Fost dak li ġie rkuprat, ix-xhud qal li fil-mobile ta’ Muscat kien hemm diversi emails li fil-Qorti ma nqrawx, kif ukoll tfittxijiet passati li saru permezz ta’ ‘search engine’ li jgħidu “How to erase Iphone” u “How to delete chat backups”.
Fil-kontroeżami, l-Avukat Vince Galea għamel diversi punti u staqsa lix-xhud jekk qattx tkellem dwar dak li xehed fil-Qorti ma’ Dr Jason Azzopardi. Ix-xhud ikkonferma li Dr Azzopardi ċempillu bejn erba’ u ħames darbiet, iżda qatagħlu għax qal “li f’dawn l-istanzi wieħed jista’ jassumi x’ried jistaqsih Dr Azzopardi”.
“Prevention is better than cure” qal l-espert Cutajar. Qal ukoll li wara rċieva numru ta’ messaġġi fuq l-application ‘Signal’ minn numru li ma kienx jaf u meta tkellem dwarhom mal-Maġistrat Inkwerenti Gabriella Vella, qaltlu li n-numru kien ta’ Dr Jason Azzopardi. Wieħed mill-messaġġi kien jinqara “I need to speak to you” u daqshekk.
Id-difiża staqsiet lix-xhud jekk għamilx kopja tal-messaġġi jew jekk intalabx jagħmel kopja tagħhom mill-Maġistrat Inkwerenti. L-espert Cutajar wieġeb fin-negattiv u żied li Signal jagħti l-faċilità lil sid il-mobile, jiddeċiedi jekk japplikax karatteristiċi tas-sigurtà, li jħassru l-messaġġi wara ċertu żmien.
Min huma l-atturi
Il-provi qed jinstemgħu kontra l-Eks Prim Ministru Joseph Muscat, l-Eks Ministru Laburista għall-Enerġija u s-Saħħa Konrad Mizzi, u l-Eks Chief of Staff ta’ Muscat, Keith Schembri, kif ukoll 11-il individwi oħra u disa’ kumpaniji.
Minbarra akkużi ta’ ħasil ta’ flus, frodi u konfoffa, Joseph Muscat u Konrad Mizzi qed jiffaċċjaw akkużi li aċċettaw tixħim u korruzzjoni f’karigi pubbliċi, filwaqt li Schembri qed ikun akkużat b’reati relatati ma’ ftehim ta’ tixħim u abbuż mill-kariga tiegħu biex jesiġi vantaġġ illegali.
Brian Tonna u Karl Cini ta’ Nexia BT huma akkużati flimkien mal-kumpanija tagħhom, li xjentement għenu lil Muscat biex jaċċetta tixħim. Ir-rappreżentant legali ta’ Steward Malta Management, l-avukat David Joseph Meli, huwa mixli kemm fil-kapaċità personali tiegħu, kif ukoll bħala rappreżentant ta’ Steward Malta Management Ltd, li kkorrompa uffiċjali pubbliċi, li jinkludu lil Muscat, Schembri u Mizzi.
Il-maniġer tal-IT il-Britanniku ta’ Steward, il-Britanniku Clarence John Conger-Thompson u l-awditur tiegħu, Christopher Spiteri, huma akkużati wkoll b’reati relatati mat-tixħim. Spiteri waħdu huwa akkużat ukoll li aġixxa b’diżonestà kbira fit-twettiq tal-attività professjonali ta’ awditur jew accountant, kif ukoll li għamel dikjarazzjonijiet foloz lil awtorità pubblika, li kiser is-segretezza professjonali u li ħalla barra jew li għamel dikjarazzjonijiet tat-taxxa foloz għall-imprenditur Pakistani Shaukat Ali Chaudhry u membri tal-familja ta’ Chaudhry.
Huwa qed jiġi akkużat ukoll li għamel falz quddiem l-inkjesta maġisterjali. Spiteri fil-kapaċità personali tiegħu kif ukoll ta’ awditur, flimkien ma’ Jonathan Vella, il-fornitur ta’ tagħmir mediku lil Ivan Vassallo u sieħbu fin-negozju Mario Victor Gatt, huma akkużati b’kontabbilità falza, kemm fil-kapaċitajiet personali tagħhom kif ukoll bħala rappreżentant ta’ Technoline Ltd u Eurybates. Ltd.
Spiteri jinsab akkużat ukoll, fil-kapaċità personali tiegħu kif ukoll ta’ awditur, flimkien ma’ Jonathan Bondin u David Meli, bħala rappreżentanti ta’ MTrace p.l.c. u Gateway Solutions Ltd, billi xjentement għamlu dikjarazzjonijiet foloz lil awtorità pubblika biex tikseb vantaġġ illeċitu. Adrian Hillman ukoll huwa akkużat b’rabta ma’ dawn l-akkużi.
It-tim tad-difiża hu komposta mill-Avukati Stefano Filletti, Jason Grima, Arthur Azzopardi, Sean Zammit, Mark Vassallo, Edward Gatt, Marion Camilleri, Franco Debono, Chris Cilia, Dean Hili, Veronique Dalli, Andrè Portelli, Giannella de Marco, Charles Mercieca, Stephen Tonna Lowell, Vincent Galea, Luke Dalli, Rachel Powell, Charlon Gouder, Dominic Micallef, Ishmael Psaila u Etienne Borg Ferranti, Shazoo Ghaznavi, Kirsty Muscat, Alex Scerri Herrera, Jessica Formosa u Jeannine Depasquale.
Il-prosekuzzjoni tmexxiet mill-Avukati tal-AĠ Francesco Refalo, Rebekah Spiteri, Shelby Aquilina u Anthony Vella, is-Supretendent Fabian Fleri u l-Ispetturi Hubert Cini u Wayne Rodney Borg. Il-każ se jkompli fis-7 ta’ Mejju, fid-9.30am.
