Illum il-poplu reġa’ ngħata prova ċara kif għandu Gvern li juża l-Parlament biex jirfes fuq id-drittijiet tan-nies u biex jipprova joħnoq kull vuċi li żżommu kontabbli ta’ għemilu. Gvern li jabbuża b’mod ċar mill-maġġoranza li għandu fil-Parlament.
Għall-kuntrarju ta’ Robert Abela li jiċċensura lill-poplu u jipprova jsikket lil kull min ma jaqbilx mal-oxxenitajiet li jkun qed jagħmel, l-Oppożizzjoni Nazzjonalista tagħti vuċi lill-poplu fil-Parlament.
F’kummenti lill-midja barra l-Parlament wara l-vot fuq il-Mozzjoni tal-Gvern biex tiċċensura lill-Oppożizzjoni u fuq il-liġi tal-Inkjesti Maġisterjali, il-Kap tal-Partit Nazzjonalista Bernard Grech qal li Robert Abela qed jikkonferma kemm qiegħed f’kantuniera tant li spiċċa jibża’ mill-poplu u qed ifassal liġijiet biex iżomm lin-nies bogħod mill-verità dwaru.
Għax għandu x’jaħbi, għax jaf li l-investigazzjonijiet jistgħu jikxfu għawwaru u dak ta’ sħabu, Abela mar il-Parlament u għadda liġi li tmur kontra kull prinċipju tad-demokrazija. Minflok imorru l-Parlament biex isaħħu d-drittijiet taċ-ċittadin, Robert Abela u l-Gvern tiegħu jmorru l-Parlament biex jisirquk mid-drittijiet li għandek.
Bernard Grech kien qed jitkellem wara li fil-Parlament il-Gvern ivvota biex iwaqqaf liċ-ċittadini milli jitolbu Inkjesti Maġisterjali fil-konfront ta’ nies fil-Gvern jew nies qrib tiegħu, u biex jipprova jwaqqaf lill-Partit Nazzjonalista milli jkompli jagħmel xogħlu favur il-poplu fil-Parlament, kif ħalfu li jagħmlu d-Deputati kollha fuq iż-żewġ naħat tal-Kamra.
Fuq it-tibdil fil-liġi dwar l-Inkjesti Maġisterjali, il-Partit Nazzjonalista vvota tliet darbiet fil-Parlament, sa mill-bidu nett, biex il-poplu jibqa’ jkollu d-dritt li jfittex il-verità, filwaqt li l-Gvern ta’ Abela vvota biex iċaħħad liċ-ċittadin mid-dritt li kellu sal-lum u biex jipproteġi lilu nnifsu u lill-politiċi korrotti.
Issa li din il-liġi għaddiet, imiss li fil-vot li jmiss, dak tal-elezzjoni ġenerali, ikun il-poplu li jivvota biex dan id-dritt li tmur għand Maġistrat u titlob li jiġu investigati l-politiċi korrotti jerġa’ jiddaħħal.
Il-Partit Nazzjonalista llejla ħareġ mill-Parlament meta l-Mozzjoni li tattakka lill-Oppożizzjoni tressqet għall-vot, kif għamel meta bdiet tiġi dibattuta l-Mozzjoni. B’hekk il-Partit Laburista llum spiċċa jivvota waħdu.
Meta kien qed jindirizza lill-ġurnalisti barra l-Parlament, Bernard Grech qal li Robert Abela u sħabu jmorru l-Parlament biex jagħmluha ta’ bullies mal-poplu u mal-Oppożizzjoni Nazzjonalista, u jmorru biex jattakkaw lil min irid juża l-Parlament għall-ġid tan-nies kif inhu xieraq. Hu spjega li l-Oppożizzjoni ma pparteċipatx f’dan il-vot għax temmen li l-ħin tal-Parlament għandu jintuża biex naraw kif se ntejbu l-ħajja tal-familji, u mhux biex ninħlew noqogħdu nattakkaw lil min jieqaf lill-Gvern minħabba l-oxxenitajiet li jagħmel.
Il-Kap tal-PN qal li l-Partit Nazzjonalista la qatt kien u lanqas qatt mhu se jkun kompliċi ma’ Gvern li jippreferi jipproteġi lill-korrotti milli jaħdem favur in-nies.
