Toni Bezzina, PN
Id-Deputat Nazzjonalista Toni Bezzina qal fil-Parlament li l-biedja u s-sajd mhumiex jingħataw il-prijorità li jixirqilhom.
Toni Bezzina qal li l-bdiewa, ir-raħħala u s-sajjieda għandu jkollhom qligħ ġust u li l-pajjiż jipproduċi biżżejjed ikel biex f’każ ta’ kriżi dinjija l-pajjiż ikun jipproduċi ikel biżżejjed għall-poplu Malti. Hu kompla li f’Malta dawn is-setturi ftit jingħataw rikonoxximent u sostna li kulħadd nesa minn fejn jiġi l-ikel ħlief dawk involuti fis-settur.
Id-deputat Nazzjonalista kompla li l-ambjent jiddependi mill-bdiewa, ir-raħħala u s-sajjieda. Hu qal li l-poplu qed jonqos lil dawn is-setturi fejn in-nies involuti qed ibatu t-tbatija li qed tiżdied kuljum. Toni Bezzina appella biex dawn in-nies ikunu megħjuna u jingħataw dak li bi dritt hu tagħhom.
Minkejja dan, dawn in-nies involuti jsibu iktar tfixkil. Ma jinftehimx kif art argikola tal-gvern mhijiex tkun ġestita mill-Ministru tal-Argikolatura biex raba’ saqwi qed tmur għad-divertiment flok għall-agrikoltura. Hu kkritika l-burokrazija li teżisti fejn lill-bdiewa qed jiddettawlhom x’inhu l-aħajr għalihom. Dan seħħ fil-każ tal-apparat dwar l-art agrikola.
Id-deputat Nazzjonalista qal li l-iskola tas-snajja, l-art agrikola, l-għajnuna li suppost tingħata, is-sussidju tal-fuel u l-miżuri pożittivi dwar l-arloġġi tal-kirjiet baqgħu ma sarux.
Hu tkellem dwar is-sajjieda u qal li l-ftit ġenwini li fadal qed isibu diffikultajiet kbar. X’sar minnha l-għajnuna mill-UE li dawn is-sajjieda suppost jieħdu? Minflok is-sajjieda ngħataw l-għajnuna bil-kwoti, qed jintużaw biex jinkisbu l-voti. Dan hu diżrispett lejn is-sajjieda, sostna Toni Bezzina.
