Janice Chetcuti, PN
Id-Deputat Nazzjonalista Janice Chetcuti sostniet fil-Parlament li l-gvern mhux iżomm il-wiegħdi mal-annimali fosthom u bi prijorità għall-isptar tal-annimali li ilu magħluq iktar minn 20 xahar.
Il-gvern qed jgħid biss li dan se jinfetaħ iżda dejjem jibqa’ magħuq, sostniet id-deputat Nazzjonalista, li kompliet li dan qed joħloq problemi kbar meta jinqalgħu emerġenzi fuq l-annimali.
Dan qed iwassal għal diffikultajiet u jintilef il-ħin propju f’mumenti meta l-annimali jkollhom bżonn kura immedjata. Dan wassal biex mietu diversi annimali propju minħabba dan il-fatt, sostniet id-deputat Nazzjonalista.
Janice Chetcuti kompliet li anki fiċ-ċimiterju tal-annimali l-gvern ma żammx kelmtu. Hi sostniet li l-gvern kien qal li l-proġett kien sar f’memorial garden fejn persuni jmorru fih u jiftakru fl-annimali li jkunu mietu. Dan hu proġett sabiħ iżda mhuwiex ċimiterju jew krematorju għall-annimali.
Id-deputat Nazzjonalista qalet li dan il-memorial garden sewa €200,000; flus li setgħu intefqu b’mod iktar għaqli. Dwar ir-rehoming centre, hi qalet li fl-2012 kien hemm diġà l-post lest ħdejn l-Isptar tal-Annimali għal dan il-proġett iżda fl-2017 il-gvern kien għadu jgħid li kien se jagħmel rehoming centre fl-istess post u m’għamel xejn.
Minħabba li propju ma sar xejn, il-gvern issa qed jerġa’ jgħid li se jagħmel dan il-proġett fl-istess post ta’ 12-il sna ilu. Il-problema kbira hi li m’hemmx iktar post fejn jitpoġġew iktar annimali.
Issa ntemm ukoll kuntratt ma’ boarding kennel privat biex iżommu l-annimali meta ma jkunx hemm post. Xogħol l-Annimal Wellfare għandu jkun wieħed li jinfuraw il-liġijiet kollha li hawn fil-pajjiż u jieħdu passi kontra min jabbuża mil-liġi. Mhux xogħolhom li jieħdu ħsieb l-annimali.
Janice Chetcuti tkellmet dwar in-neutering campaign fejn il-wiegħda kienet li jkun hemm ħames kliniċi iżda hemm biss klinika waħda fin-Naxxar. Hi qalet li f’Malta hawn biss żewġ annimal stewards u m’hawnx post fejn dawn l-annimali jirkupraw wara li tkun saritilhom l-operazzjoni.
Il-gvern għandu jagħti l-appoġġ lil dawn il-voluntiera, sostniet id-deputat Nazzjonalista, li qalet li l-PN jaqbel mal-amnestija lil dawk li għandhom annimali eżostiċi biex isir inventarju reali dwar l-annimali li hawn fil-pajjiż iżda l-PN qed jipproponi li l-amnestija tingħata biss lil dawk in-nies li l-annimali kienu miżmuma f’kundizzjoni tajba.
Hi esprimiet pożizzjoni li ma tingħatax amnestija lil min żamm l-iljuni u l-pantera eżotiċi fin-Naxxar fejn kienu qed jinżammu f’post mhux dinjitiż. Jirriżulta li dawn l-annimali għadhom jinżammu fl-istess postijiet, sostniet id-deputat Nazzjonalista.
