Fil-Parlament illejla, il-gvern ivvota biex tkun ċensurata l-Oppożizzjoni u biex jitneħħa d-dritt tal-inkjesti maġisterjali liċ-ċittadini.
Dan il-vot ittieħed fi tmiem is-seduta parlamentari tal-lejla li fiha intervjena l-Kap tal-Oppożizzjoni Bernard Grech.
Il-Kap tal-Oppożizzjoni qal li din hi mozzjoni ta’ ċensura fuq l-Oppożizzjoni u attakk fuq id-demokrazija.
Hu sostna li l-gvern se jkun qed jivvota waħdu fil-Parlament u qal li l-PN ma jridx ikollu x’jaqsam ma’ din il-mozzjoni, li hi attakk fuq il-123,000 persuna li tirrappreżenta l-Oppożizzjoni. Il-Kap tal-Oppożizzjoni rrifera għal deċiżjoni tal-Ispeaker dwar meta u kif jittieħdu l-voti fiżiċi fil-Parlament. Hu qal li ma kinitx qed tkun segwita l-proċedura jekk jittieħed dan il-vot.
Bernard Grech qal li dan hu vot kontra d-demokrazija u mhux suppost li se jittieħed fil-Parlament. Għalhekk jekk dan il-vot jittieħed dan ikun attakk fuq id-demokrazija. Quddiem din is-sitwazzjoni l-Oppożizzjoni, se toħroġ ‘il barra mis-seduta kif għamlet tul id-dibattitu parlamentari, qal il-Kap tal-Oppożizzjoni.
Meta ttieħed il-vot, kien hemm is-37 vot tad-deputati Laburisti favur u ma kien ebda vot kontra għax l-Oppożizzjoni ma kinitx fil-Parlament.
Wara dan il-vot, tressaq il-vot dwar l-emendi fil-Kodiċi Kriminali dwar l-inkjesti li fiha l-vot kien 37 vot favur u 30 vot kontra. Dan il-vot ifisser li l-gvern issa neħħa d-dritt liċ-ċittadini li jmorru għand maġistrat biex issir inkjesta maġisterjali bl-informazzjoni li jkollhom.
