Mark Anthony Sammut, PN
Id-Deputat Nazzjonalista Mark Anthony Sammut sostna fil-Parlament li l-gvern qed jagħmel tajjeb għall-isparpaljar fl-awtoritajiet billi jdur għad-dilettanti tal-karozzi.
Mark Anthony Sammut qal li l-miżuri dwar it-trasport li tħabbru fl-aħaħr ġranet se jiswew €15-il miljun meta fil-budget hemm allokazzjoni ta’ €5 miljun għal dan is-settur.
Dan juri li l-gvern se jerġa’ jagħmel bħas-sena ta’ qabel meta f’Ottubru 2023 approva l-budget b’nefqa ta’ €8 biljun iżda fl-estimi supplimentari tal-aħħar tas-sena, il-gvern – bla diskussjoni – alloka €1 biljun iktar min-nefqa approvata tas-sena ta’ qabel. Dan ifisser 13% iktar.
X’rilevanza għad għandu l-eżerċizzju tal-budget f’dan il-kuntest? staqsa d-deputat Nazzjonalista, li qal li l-Ministeru tat-Trasport kellu budget ta’ €267 milun iżda fis-supplimentari kellu jonfoq €114-il miljun iktar.
Id-deputat Nazzjonalista staqsa jekk il-miżuri li tħabbru nhar is-Sibt li għadda kinux kunsidrati finanzjarjament iktar u iktar bl-infiq fi promozzjonijiet għall-bażużli.
Il-Ministru tat-Trasport se jfalli l-Awtorità jekk jibqa’ sejjer hekk, sostna d-deputat Nazzjonalista, li qal li biex jagħmel tajjeb il-gvern qed joħroġ il-multi tal-2023.
Dak iż-żmien il-gvern kien issospenda numru minn dan il-multi iżda minn wara l-elezzjonijiet tal-Parlament Ewropej qed jerġgħu jinħarġu dawn il-mutli. Kf jistgħu ċ-ċittadini jiddefendu lilhom infushom issa wara sentejn? Dawn huma kontravenzjoni kbar ta’ €500 l-waħda u mhumiex sempliċi multi amministrattivi.
Mark Anthony Sammut kompla li tant hemm inkonsistenza dwar dawn il-multi li l-liġijiet ma jaqblux dwar quddiem liema qorti jew tribunal dawn iridu jkunu kontestati.
Il-gvern irid jagħmel tajjeb għaż-żieda fl-infiq anki billi jdur fuq id-dilettanti tal-kaorzzi klassiċi u vintage li ftit li xejn jinstaqu. Dawn mhumiex il-karozzi li qed jikkaġunaw it-traffiku fil-pajjiż u ma jinftehimx kif il-parametri issa telgħu għal 35 sena. Il-PN ma jaqbilx ma’ din il-miżura u mhux magħruf kif din se tnaqqas l-abbuż. Din se tnaqqas biss in-numru ta’ karozzi klassiċi.
Id-deputat Nazzjonalista kompla li l-gvern kien ippubblika avviż legali dwar il-pjanċi biex vetturi li ma jkollhomx fejn ipoġġuhom fuq quddiem jingħataw sticker. Minkejja li għaddew sentejn u nofs minn dan l-avviż legali għad mhemmx mod kif xi ħadd jista’ japplika għal dawn l-istickers.
