Stanley Zammit, PN
Ix-Shadow Minister għall-Ippjanar u l-Artijiet Stanley Zammit ikkritika b’mod qawwi n-nuqqas ta’ viżjoni u pjanar strateġiku minn naħa tal-Gvern.
“Il-poplu qed ibati kuljum riżultat ta’ politika msejsa fuq żieda sfrenata u bla pjan tal-popolazzjoni. Gvern li ma jagħrafx fejn qiegħed, ma jistax jippjana fejn irid jasal,” sostna Zammit, filwaqt li rrimarka kif il-Ministru responsabbli għall-Ippjanar ma semma’ xejn dwar l-istess qasam waqt id-dibattitu fuq il-baġit.
L-iżvilupp f’Malta ilu żmien bla bilanċ, bla rispett lejn il-komunitajiet u xi drabi kontra l-interess pubbliku. Is-sistema tal-ippjanar tilfet il-fiduċja tan-nies u li qed twassal għal prezzijiet tal-propjetà li qed jisplodu minn ġurnata għall-oħra.
Minkejja li saru diversi wegħdi dwar reviżjonijiet tal-iSPED u l-Pjanijiet Lokali, dawn għadhom ma seħħewx. Hu qal ukoll li l-Gvern reġa’ għażel li jmexxi l-arloġġ lura bil-ħatra ta’ Johann Buttigieg bħala Chairman tal-Awtorità tal-Ippjanar, li jirrappreżenta kontinwazzjoni ta’ approċċ fallut.
Il-PN qed jissokta jsejjaħ għal studju xjentifiku dwar il-Carrying Capacity tal-pajjiż, viżjoni ġdida u olistika għall-iSPED, reviżjoni sħiħa tal-Pjanijiet Lokali bbażata fuq parteċipazzjoni ġenwina u kodiċi ta’ ppjanar li jiggarantixxu kwalità u sostenibbiltà.
L-Istat hu l-akbar sid tal-art, iżda llum qed jopera b’infrastruttura u sistemi legali li kienu adattati għal żmien ieħor u li llum qed iġibu biss dubji, mhux fiduċja. Appella għal sistema diġitali trasparenti għall-informazzjoni dwar l-użu ta’ art pubblika u għal bordijiet aktar professjonali u indipendenti biex jiddeċiedu dwar l-artijiet.
Stanley Zammit iddeskriva l-introduzzjoni tal-liċenzjar tal-kuntratturi bħala reazzjoni f’paniku, u qal li l-każijiet reċenti ta’ kollass fil-kostruzzjoni juru li l-Gvern għadu ma tgħallimx mill-mewt ta’ Jean Paul Sofia. Hu saħaq li hemm bżonn ta’ sistema ta’ infurzar vera, integrazzjoni bejn entitajiet u rikonoxximent professjonali għall-esperti fis-saħħa u s-sigurtà fuq ix-xogħol.
Stanley Zammit appella biex Malta tingħata direzzjoni vera u pjan ta’ kwalità u qal li n-nies mhumiex jistennew xi ħaġa ta’ barra minn hawn iżda jridu ċertezza, serħan il-moħħ u sistemi li jagħtuhom fiduċja.
