Id-dinja qed tfakkar persuni bil-kundizzjoni tal-awtiżmu; kundizzjoni li tolqot lil wieħed minn kull 59 persuna, anke jekk is-sintomi ma jkunux daqstant ovvji daqskemm huma għal persuni oħra. Dan ifisser li 135 miljun persuna fid-dinja kollha għandha din il-kundizzjoni li timmanifesta ruħha b’modi differenti, fejn fost oħrajn, wieħed isibha diffiċli li jikkomunika, tant li jkun jeħtieġ ta’ spazju aktar kalm fejn stimuli sensorjali jkunu mnaqqsa.
F’dawn l-aħħar snin, l-awtiżmu ngħata aktar attenzjoni sabiex wieħed jifhem lill-persuna b’din il-kundizzjoni u fuq kollox jiġu offruti postijiet aktar aċċessibbli u inklussivi għall-persuni fuq il-firxa wiesgħa ta’ awtiżmu u l-familji tagħhom.
Fil-Jum Dinji li jfakkar l-Awtiżmu, mart il-Kap tal-Partit Nazzjonalista, AnneMarie Grech iltaqgħet ma’ tliet żgħażagħ bil-kundizzjoni tal-Awtiżmu biex magħhom tiddiskuti aspetti u esperjenzi li jgħaddu minnhom dawn. Minkejja l-isfidi kollha li persuni bl-Awtiżmu jaffaċċjaw, dawn it-tliet żgħażagħ, Andreas Juan Portelli, student tal-inġinerija; Luke Briffa li għandu Baċċelerat fil-Visual Design & Game Art; u Jessica Mifsud, studenta tal-arti enfażizzaw li xorta qed jirnexxilhom jaslu għall-ħolm tagħhom.
Stqarru li l-akbar sfidi fost persuni bl-Awtiżmu huma biex isibu impjieg, irid isir ħlas għal ċertu servizzi, nuqqas ta’ riżorsi, u nuqqas t’għarfien li jwassal biex dawn il-persuni jiġu ttimbrati. Minkejja dan kollu huma spjegaw kif xorta waħda għandhom ħbieb bħal ħaddieħor, joffru xogħol ta’ eċċelenza, kapaċi jistudjaw u jiggradwaw u involuti wkoll f’għaqdiet.
Il-kundizzjoni ma taffettwax lil kulħadd l-istess għalhekk għandna nuru rispett lejn kull individwu.
Ritratti: Martin Agius
