Wara l-avvenimenti li ġraw nhar t-Tnejn li għadda, il-klabb tal-Isla qed jinsisti li ġew imċaħdin mir-rebħ tar-Regatta. U għaldaqstant, se jkunu qed jieħdu parir legali dwar il-pass li jmiss.
Waqt ir-Regatta ta’ Jum il-Ħelsien, it-tiġrija ta’ bi tnejn intrebħet mill-Isla, illi daħlu qabel Bormla u l-Birgu rispettivament. Iżda fi tmiemha Bormla ipprotestaw minħabba inċident li nqala’ fil-bidu tat-tiġrija, hekk kif id-dgħajsa tal-Marsa ħabtet ma’ dik ta’ Bormla. U wara ħafna ħin ta’ battibekki u kontroversji ġie deċiż li t-tiġrija terġa’ ssir.
Il-klabb tal-Isla fakkar li ċ-Chief Judge qiegħed hemm biex jagħmel xogħlu u kellu jkun hu li jiddeċiedi l-affarijiet, kif dejjem sar matul is-snin.
F’dan il-każ ma ħassx li kellu japplika r-regolament partikolari – ir-regolament 3.13. Dan apparti li nkisru regolamenti oħrajn.
