It-tibdil fid-distretti elettorali propost mll-membri tal-Kummissjoni Elettorali nominati mill-Partit Laburista, fir-rapport li tressaq ilbieraħ quddiem il-Parlament jaqsam numru ta’ lokalitajiet b’mod li l-vuċi tar-residenti qed tiġi mdgħajfa, flok imsaħħa.
Fost dawn hemm Birkirkara li b’dak li qed jipproponi l-Gvern, qed tinqasam fi tnejn u minflok se tibqa’ tifforma l-qalba tat-Tmien Distrett issa se tispiċċa maqsuma bejn it-Tmien u l-Ewwel Distrett Elettorali. Fl-istess ħin Tal-Pietà se titlaq mill-Ewwel Distrett biex tmur mad-Disa’ Distrett, waqt li parti min-Naxxar tingħaqad mat-Tmien Distrett, u Marsaskala tinqasam biex parti minnha titlaq mit-Tielet Distrett u tmur mat-Tieni. Dawn jiżdiedu mal-Fgura, li hija diġà maqsuma.
Dan mhuwiex aċċettabbli u l-membri tal-Kummissjoni Elettorali nominati mill-Partit Nazzjonalista ressqu rapport minoritarju bil-proposti tagħhom dwar kif għandha ssir din ir-reviżjoni. Reviżjoni li qed issir minħabba li skont il-Kostituzzjoni d-daqs tal-popolazzjoni f’kull distrett ma jistax ivarja b’aktar jew inqas minn 5% bejniethom.
Ir-rapport tal-minoranza hu mibni fuq il-premessa li l-lokalitajiet ma għandhomx jiġu maqsumin u jibqgħu kemm jista’ jkun f’distrett wieħed ħalli l-vuċi ta’ kull lokalità u tar-residenti tagħha tkun imsaħħa, u mhux imdgħajfa f’kull distrett.
Fil-fatt, f’dan ir-rapport saru sforzi biex kemm jista’ jkun l-ebda belt jew raħal f’Malta ma tinqasam. Infatti l-unika eċċezzjoni kienet fil-każ tal-Madliena li bħala hamlet kienet proposta li tinqata’ għaliha u tmur f’distrett differenti.
Dan kuntrarju għal dak li qed jagħmel il-Labour, li jrid idgħajjef dawn il-lokalitajiet.
Għalhekk il-Partit Nazzjonalista fil-Parlament se jkun qed jivvota kontra r-rapport li tressaq mill-Kummissjoni Elettorali u favur il-Minority Report li jħalli l-lokalitajiet sħaħ fl-istess distretti. Għax huwa hekk biss li tkun qed tissaħħaħ il-vuċi tar-resident fil-lokalitajiet rispettivi.
