“L-aħbar mill-Qorti li Joseph Muscat ħassar il-kontenut tat-telefon tiegħu qabel il-Pulizija ġabruhulu fil-kuntest ta’ Qorti, mhix prova tal-ħtija tiegħu. Imma fil-kuntest politiku ta’ Prim Ministru li allegatament seraq tliet sptarijiet tal-poplu Malti, Muscat jikkundanna lilu nnifsu.”
Dan saħqitu l-NGO Repubblika fejn spjegaw li importanti li l-poplu ma jinsiex il-fatt li wara li ħassar il-kontenut tat-telefon tiegħu, Joseph Muscat irrifjuta li jagħti l-PIN number tat-telefon lill-Pulizija.
L-għaqda elenkat lista ta’ affarijiet fosthom li Muscat tratta lill-Pulizija u lill-istituzzjonijiet tal-pajjiż b’disprezz; li l-istess Joseph Muscat ibbenefika minn leaks illegali mill-inkjesta maġisterjali li kienet qed tistħarrġu u li tatu ċans iħassar il-provi; kif ukoll allegat li s-sors ta’ dawn il-leaks lil Joseph Muscat huma aktarx fil-Korp tal-Pulizija.
Dan filwaqt li Repubblika spjegat li għaldaqstant l-Eks Mexxej Laburista kellu x’jaħbi u beża’ li jekk ma jħassarx il-provi minn fuq it-telefon tiegħu kien isofri konsegwenzi serji.
Stqarret li l-episodju jikkonferma wkoll li l-ġlieda kontra l-korruzzjoni teħtieġ ir-riżorsi kollha possibbli biex tiġġieled il-ħażen tal-kriminali.
“It-tneħħija tal-aċċess taċ-ċittadini li jitolbu lill-maġistrati jagħmlu inkjesti partikolarment fejn il-Pulizija tirrifjuta li tinvestiga jkompli jżarma l-għodda foqra tal-istat Malti biex jagħmel din il-ġlieda.”
L-għaqda tenniet l-appell tagħha lill-Gvern biex jirtira l-Abbozz 125 u sejħu lill-persuni kollha ta’ rieda tajba jseħbuha fil-protesta tas-6 tal-lejla quddiem il-Parlament.
