Il-Membri tal-Parlament Ewropew tal-Partit Laburista Alex Agius Saliba, Daniel Attard u Thomas Bajada vvutaw kontra n-negozji u l-SMEs Maltin u Għawdxin. Dan hekk kif bħalissa d-diskussjoni fuq livell Ewropew hi dwar kif jistgħu jitnaqqsu r-regoli u r-rekwiżiti għan-negozji, biex minflok jintilfu f’burokrazija żejda, ikunu jistgħu jiffukaw aktar fuq kif jistgħu jkabbru n-negozju tagħhom.
Fil-kampanja elettorali ta’ Ġunju li għadda, waħda mit-temi li spikkaw fid-diskussjoni kienet dik fejn negozji kienu qed jopponu l-introduzzjoni ta’ burokrazija żejda, li kienet tfisser li r-riżorsi tagħhom iridu jkunu ddedikati għal proċessi amministrattivi, minflok biex ikunu innovattivi, jimpjegaw aktar nies u joħolqu aktar ġid. Fid-dawl ta’ din id-diskussjoni, l-Parlament Ewropew beda b’ħidma minnufih biex jagħmel il-ħajja tan-negozji – speċjalment tal-SMEs u dawk in-negozji tal-familja – aktar faċli, u b’hekk jipposponi l-introduzzjoni ta’ ċertu obbligi ġodda.
F’dak li kellu jkun l-ewwel vot importanti f’dan il-proċess hekk imsejjaħ ‘Stop the clock’ – vot li għadda b’maġġoranza ta’ 427 vot favur u 221 vot kontra – l-MEPs tal-Partit Laburista vvutaw kontra. F’messaġġ ċar li ma jridux li dawn ir-regolamenti ġodda jiġu posposti, iżda jridu li n-negozji u l-SMEs Maltin u Għawdxin jgħaddu mill-proċess tal-burokrazija żejda.
Il-Membri tal-Partit Nazzjonalista, minn naħa tagħhom, b’mod konsistenti kif dejjem għamlu, ivvutaw favur biex il-proċess fi ħdan il-Parlament Ewropew isir b’mod mgħaġġel.
Bosta analisti u negozjanti li tkellmu ma’ dan is-sit esprimew ix-xokk u r-rabja tagħhom għall-fatt li t-tliet MEPs Laburisti, minflok iddefendew l-interessi tal-Maltin u Għawdxin, għażlu li jimxu mal-linja ordnata fuqhom mill-Grupp tas-Soċjalisti. “Aħna vvutajnilhom biex jiddefendu lilna, mhux biex jiddefendu lil ħaddieħor,” qalilna sid ta’ ħanut tal-ħwejjeġ.
Il-vot finali biex jiġu posposti l-proċessi ta’ rappurtar minn negozji u l-SMEs se jsir għada l-Ħamis.
