Lokali Qorti

Mixli li ta fastidju lil ommu wara li talabha l-flus għad-droga

Raġel ta’ 35 sena minn San Ġwann wieġeb mhux ħati li ta fastidju lil ommu hekk kif talabha l-flus għad-droga. Fil-Qorti, quddiem il-Maġistrat Rachel Montebello, il-prosekuzzjoni qalet li fil-31 ta’ Marzu, ommu rrapportat lill-Pulizija u infurmat lill-Ispettur li binha għandu vizzju qawwi tad-droga u li qed jonfoq flusha kollha fuq id-drawwiet ħżiena għas-saħħa tiegħu.

L-Ispettur Sharona Buhagiar qalet liIl-Qorti li l-akkużat ma joqgħodx ma’ ommu iżda kien jgħix f’post li huwa proprjetà tagħha. L-omm qalet lill-Ispettur li kontinwament jitlobha l-flus li jispiċċa jonfoqhom kollha f’tempi ta’ tlett ijiem.

Il-vittma spjegat lill-Ispettur li ilha għaddejja minn din is-sitwazzjoni għal sitt snin sħaħ u l-Pulizija ġiet infurmata li l-omm tat lil binha total ta’ €33,000. L-akkużat qal lill-Qorti li bħalissa jinsab bla xogħol. L-avukat difensur Illona Schembri ma talabitx għal libertà proviżorja peress li lanqas residenza fissa fejn l-akkużat jista’ jgħix peress li l-omm qalet lill-Qorti li ma tistax taċċettah lura.

Hawn hi talbet lill-Qorti biex tgħid tagħha u hawn b’mod emozzjonat qalet: “Għandi numru ta’ pitturi tal-mibki żewġi, li kienu lesti biex ibni jbigħ għal aktar flus.” Sadanittant inħarġet ordni ta’ protezzjoni mill-Qorti favur l-omm u l-Maġistrat Rachel Montebello infurmat lill-akkużat li hu pprojbit milli jikkuntattja jew javviċina lil ommu akkost ta’ kollox.

Huwa nżamm arrestat wara li ma saret l-ebda talba għall-ħelsien mill-arrest imma saret rakkomandazzjoni lid-direttur tal-ħabs biex l-imputat jinżamm detenut fit-taqsima forensika tal-ħabs. Il-Qorti laqgħet it-talba fis-sens fejn għamlet appell lid-Direttur biex jara li jingħata l-aħjar kura għall-problema li għandu.