mid-Deputat Nazzjonalista Justin Schembri
Shadow Minister għall-Edukazzjoni u s-Snajja’
Fi tmiem il-ġimgħa li għadda assistejna għall-konkors annwali ‘Mużika Mużika’, serata li issa daħlet sewwa fil-kalendarju annwali tal-Maltin.
Il-konkors huwa ċelebrazzjoni ta’ dak kollu li huwa Malti, u għalhekk għandu sehem importanti għalina bħala pajjiż. Irrid nibda billi ngħid kemm hu importanti li serati bħal dawn jingħataw l-attenzjoni li jixirqilhom għaliex l-artist Malti jkollu l-opportunità li jesponi ruħu fuq l-istage ta’ avveniment daqstant popolari u segwit. Għalhekk, qiegħed niddedika din il-paġna biex nirrikonoxxi t-tliet serati eċċezzjonali li tana ‘Mużika Mużika’, fil-ħames edizzjoni tiegħu. Dan grazzi għall-organizzaturi, għall-kantanti, għall-mużiċisti u għall-artisti Maltin li jesebixxu t-talenti li tant għandna nkunu kburin bihom.
Pjattaforma għat-talent Malti
Kull avveniment li jservi ta’ pjattaforma għat-talent Malti għandu jkun applawdit u mogħti s-sapport assolut tagħna, u meta l-livell li jintlaħaq ikun tassew għoli, aktar u aktar. Għalhekk nibda billi nifraħ lill-kantanti, lill-awturi, lill-kompożituri u lill-mużiċisti għas-16-il kanzunetta li smajna, kantajna magħhom u emozzjonawna lkoll.
Nemmen li l-livell kien tassew tajjeb, u dan qiegħed ikompli jsaħħaħ il-mużika lokali għaliex ir-rispons tal-pubbliku jikkonferma l-interess ġenerali. Ovvjament, irrid nifraħ lil Jamie Cardona, ir-rebbieħ tal-konkors, li seraq il-qlub tal-udjenza u tal-pubbliku b’mod evidenti.
Kien ċar biżżejjed li n-nies riedet lil Jamie jirbaħ u għalhekk ma kienet ebda sorpriża li finalment kien dikjarat rebbieħ. Għoġbitni tassew id-determinazzjoni u r-rieda tiegħu, li jieħu sehem u jikkonnettja mal-pubbliku minkejja li mhuwiex neċessarjament meqjus bħala ‘kantant’. Il-kanzunetta tiegħu twassal messaġġ sabiħ u li jilħaq lil ħafna nies, u għalhekk grazzi.
Mhux l-ewwel darba li tqum id-diskussjoni dwar jekk il-kanzunetta Maltija għandhiex livell għoli jew le. Anzi ġeneralment id-diskussjoni tkun aktar iċċentrata mal-lingwa Maltija li għal ħafna mhix adattata biżżejjed biex kanzunetta jkollha l-ogħla livell. Madankollu, grazzi għall-konkors ‘Mużika Mużika’ din il-perċezzjoni bdiet ftit ftit titjieb u llum nafu li l-kanzunetta lokali bil-Malti hija tajba biżżejjed biex tagħtina gost u tferraħna. Fuq kollox, il-kanzunetta lokali tgħaqqad poplu, għaliex l-użu tal-lingwa Maltija fil-kanzunetti tista’ ġġibna lkoll flimkien.
Il-lingwa Maltija
Irrid nikkummenta dwar il-lingwa Maltija. Ovvjament, bħalma ħafna minnkom jafu, għandi passjoni għal-lingwa tagħna, u dawn huma okkażjonijiet biex napprezzawha u niftaħru biha. Il-lingwa tagħna kapaċi tpaxxina, u meta f’mumenti bħal f’dan il-konkors narawha tisseddaq mal-mużika tal-orkestra u tferraħ l-udjenza, nitkabbru aktar.
Kemm huwa sabiħ li llum għandna pjattaforma li nistennewha minn sena għal sena, li permezz tagħha nsaħħu din il-lingwa tant prezzjuża permezz ta’ melodiji li jibqgħu magħna għas-snin li ġejjin.
Nifhem li konkors bħal dan jiswa l-mijiet ta’ eluf mill-fondi nazzjonali, madankollu jixraq li kull kanzunetta li tasal sa din il-fażi tingħata l-opportunità, b’fondi allokati apposta u bi skemi speċifiċi, sabiex ikollha wkoll music-video li jittella’ fuq sit maħluq għal dan il-għan. B’hekk, kieku jkollna kull kanzunetta fuq sit wieħed li jiċċelebra l-kanzunetta Maltija.
Kemm tkun ħaġa sabiħa li kieku jkollna librerija online speċifikament għall-kanzunetta Maltija li hawn ħafna li tant jgħożżu. Dan ngħidu għaliex ninsab ċert li se jgħaddi ż-żmien u se nibqgħu nisimgħu kanzunetti li smajniehom għall-ewwel darba din is-sena, bħalma għadna ngawdu dawk li waslu sal-fażijiet tal-finali fl-ewwel erba’ snin ta’ ‘Mużika Mużika’.
M’għandniex inċappsu konkors bħal dan bil-politika
Dan huwa dak li jgħaqqadna lkoll flimkien, u għalhekk nistmerr kull idea li konkors bħal dan jiċċappas bil-politika partiġjana, b’kull forma tagħha. Irrid ngħid li l-introduzzjoni tal-Prim Ministru Abela u l-Ministru Bonnici, hekk kif milqugħa fis-sala kienet pjuttost redikola u barra minn lokha.
Ladarba qiegħed nitkellem dwar dan, ma nistax ma nsemmix is-silta eċċezzjonali ‘Tema 79’ kantata mill-bravi Mary Spiteri u Cliff Zammit Stevens li bla dubju għandha konnotazzjoni u referenzi politiċi partiġjani. Mingħajr ma nnaqqas il-mertu tal-prestazzjoni (li tqabbdek il-bard!), u mingħajr ma nidħol fil-polemika li tqajmet fuq il-midja soċjali, wieħed jiddubita jekk din kinetx għażla għaqlija għal serata li żgur għandha tkun elevata ’l fuq mill-politika. Ċertament, li nistgħu nkunu maturi biżżejjed, u nistgħu nkunu aħjar, bħala poplu wieħed.
Nagħlaq billi mill-ġdid nifraħ lill-kantanti, lill-awturi, lill-kompożituri u lill-mużiċisti li flimkien mal-organizzaturi tawna serata mill-isbaħ u li tibqa’ fil-memorja mużikali Maltija. Insellem lil dawk kollha li ħadmu qatigħ u ma waslux sal-fażi finali, u nifirħilhom bil-quddiem għal darb’oħra.
Dan l-artiklu deher f’In-Nazzjon tal-Erbgħa 2 ta’ April, 2025.
