Il-persuni bl-awtiżmu għandhom jingħataw il-possibbiltà li javvanzaw fil-ħajja tagħhom b’edukazzjoni xierqa, bi programmi edukattivi speċjalizzati li jirriflettu l-ħtiġijiet tagħhom u terapiji li jistgħu jagħmlu differenza reali fil-ħajja tagħhom. Dan jgħin biex huma jkollhom l-istess opportunitajiet ta’ impjieg u parteċipazzjoni soċjali bħal ħaddieħor. Programmi ta’ taħriġ u opportunitajiet ta’ xogħol għandhom ikunu b’mod li juru biċ-ċar il-ħiliet uniċi tagħhom biex ikunu jistgħu jgħixu ħajja ta’ suċċess.
Kien dan li ħareġ minn stqarrija miktub mix-Shadow Minister għall-Inklużjoni u l-Volontarjat, Graziella Galea f’isem il-Partit Nazzjonalista hekk kif illum qed jitfakkar il-Jum Dinji tal-Awtiżmu, bit-tema “L-avvanz tan-newrodiversità u l-għanijiet ta’ żvilupp sostenibbli tan-Nazzjonijiet Uniti”, il-Partit Nazzjonalista jtenni l-ħtieġa ta’ għarfien dwar l-awtiżmu, kif ukoll l-importanza li titjieb il-ħajja ta’ dawk li jbatu mill-awtiżmu u l-familji tagħhom. It-tema magħżula għal din is-sena tħares lejn is-sinifikat tar-rikonoxximent u l-promozzjoni tan-newrodiversità, filwaqt li tikkordina l-inizjattivi mal-għanijiet akbar tal-iżvilupp sostenibbli stabbiliti min-Nazzjonijiet Uniti.
Madwar Malta u Għawdex, insibu mijiet ta’ persuni li għandhom il-kundizzjoni tal-awtiżmu. L-aħħar ċifri juru li t-total ta’ studenti li għandhom l-ADHD u li bdew jew komplew bl-istudji tagħhom jammonta għal madwar 1,800 mifruxa fi skejjel tal-Istat, tal-Knisja u Indipendenti. In-numru ta’ studenti reġistrati mal-Inclusive Education Unit fl-MCAST għall-awtiżmu hu ta’ madwar 200 student. Dan minbarra għadd ta’ persuni oħrajn li komplew bl-istudji tagħhom fl-Università ta’ Malta, minkejja l-kundizzjoni li għandhom.
Il-Partit Nazzjonalista jħoss li kull persuna bl-awtiżmu għandha d-dritt li tgħix ħajja sħiħa, rispettata u inklużiva fis-soċjetà tagħna. Din hi sfida soċjali li lkoll kemm aħna nistgħu naraw li tingħeleb. Hu importanti li nnaqqsu l-istigma u nrawmu soċjetà li tifhem u tapprezza d-diversità. Hu għalhekk li l-Partit Nazzjonalista jħeġġeġ lill-Gvern biex jipprovdi l-appoġġ kollu meħtieġ lill-persuni bl-awtiżmu, lill-familji tagħhom u lill-istituzzjonijiet edukattivi u fil-posijiet tax-xogħol.
L-appoġġ ma għandux ikun biss wieħed finanzjarju, izda wkoll psikoloġiku. Il-familji għandhom ikunu jistgħu jistrieħu fuq is-sistema tagħna, mhux jiġġieldu magħha. Hu essenzjali li nkomplu nżidu l-għarfien dwar l-awtiżmu u nippromwovu d-drittijiet ta’ dawn il-persuni. Is-soċjetà u l-awtoritajiet għandhom id-dover li jassiguraw kull għajnuna possibbli biex l-ebda persuna ma taqa’ lura minħabba l-kundizzjonijiet partikolari li tista’ tkun qed tiffaċċja.
Il-Partit Nazzjonalista jirringrazzja lid-diversi organizzazzjonijiet u professjonisti li jaħdmu b’dedikazzjoni biex iwasslu aktar għarfien u joffru l-assistenza meħtieġa lill-persuni bl-awtiżmu. Hu biss jekk naħdmu id f’id mal-għaqdiet volontarji, esperti, professjonisti, persuni b’diżabbiltà u l-familji tagħhom li nistgħu niżguraw inizjattivi li jwasslu għal suċċess b’soċjetà aktar ġusta u inklużiva fejn ħadd ma jitħalla jaqa’ lura.
