L-Erbgħa filgħaxija l-pjazza tal-Parlament imtliet b’persuni jipprotestaw kontra l-vot li ħa l-Gvern Laburista kontra d-drittijiet tal-poplu Malti u Għawdxi; vot li jfisser li għaċ-ċittadin se tkun diffiċli ferm biex jitlob maġistrat jinvestiga allegat korruzzjoni.
Qalb kartelluni b’messaġġ waħdieni – Kabinett Kompliċi mal-Kriminali – tfakkar kif il-Gvern Laburista, ma’ kull vot li jieħu, mhux qed jivvota biex iħares lill-Maltin u l-Għawdxin iżda qed jaħseb biex jgħatti u jipproteġi lil membri Laburisti u oħrajn tal-qalba ħalli jinvolvu ruħhom fil-kriminalità bla ma ħadd iwaqqafhom.
F’diskors li għamel il-President Onorarju ta’ Repubblika, Robert Aquilina, huwa fakkar kif bl-aġir tal-Labour qed naraw flusna stess itiru mar-riħ. B’dan il-vot li ttieħed ma fisser xejn għajr membri parlamentari Laburisti li għandhom il-faħam miblul.
Aquilina qal li minkejja dan l-aġir tal-Labour, il-poplu mhux se jieqaf mill-ġlieda tiegħu sabiex ikollu lura t-tmexxija li vvota għaliha fl-elezzjoni ġenerali.
Preżenti fost in-nies fuq barra tal-Parlament kien hemm il-Kap tal-Partit Nazzjonalista Bernard Grech flimkien ma’ deputati Nazzjonalisti li ngħaqdu mal-folla wara li ttieħed il-vot. Dan sabiex iwasslu l-messaġġ li huma wkoll mhux se jkunu qed iħallu kollox għaddej qisu xejn mhu xejn b’detriment għall-poplu kollu.
Intant, indirizzat ukoll lil dawk preżenti l-President ta’ Repubblika, Vicki Ann Cremona fejn appellat biex wieħed jibqa’ jiġġieled għad-demokrazija quddiem dawk li jridu jxekluha. U kien hawnhekk fejn fakkret fl-importanza għall-ġlieda favur pajjiżna.
Repubblika qalet ukoll li se tieħu passi fil-Qorti Kostituzzjonali kontra l-liġi li daħħal il-Gvern
