Raġel ta’ 44 sena minn Ħal Tarxien beda għaddej ġuri quddiem l-Imħallef Consuelo Scerri Herrera akkużat li stupra lil martu. L-allegati reati ta’ stupru seħħew f’Jannar u f’Mejju ta’ sitt snin ilu meta l-koppja kienet għaddejja minn proċeduri ta’ separazzjoni u dan wara li l-mara ma riditx tibqa’ tgħix ma’ żewġha wara l-ewwel stupru.
Ir-raġel dejjem ċaħad l-akkużi miġjubin kontrih li jinkludu wkoll li ġiegħel lil martu tagħmel xi ħaġa kontra l-volontà u l-mistħija tas-sess tagħha. Il-każ imur lura għal Jannar u għal 31 ta’ Mejju tal-2019. Kien f’Mejju meta l-mara kienet ittieħdet l-Isptar Mater Dei wara li hi tkellmet mal-Pulizija, li qaltilhom li żewġha kien strupraha.
L-akkuża tgħid li meta r-raġel sar jaf li martu riedet tissepara minn miegħu, huwa allegatament qattalha ħwejjiġha u kkommetta l-istupru. Meta seħħ dan il-mara ma għamlitx rapport lill-Pulizija mill-ewwel minħabba li huwa heddidha, li jekk tagħmel dan kien se jikkommetti atti ferm agħar.
F’mument minnhom il-mara kienet ukoll iddeċidiet li tagħtih ċans ieħor, madankollu f’lejla partikolari li kien fil-jum tas-Sibt f”Mejju, l-akkużat ma kienx mar lura d-dar u għalhekk kienet ħadet id-deċiżjoni finali li tkompli bil-proċeduri ta’ separazzjoni.
Irriżulta wkoll li waqt il-proċeduri ta’ separazzjoni l-koppja kienet għadha tgħix taħt l-istess saqaf u anke jorqdu fl-istess sodda. It-tieni nċident kien seħħ meta l-akkużat kien irritorna d-dar fl-4am wara li qatta’ l-lejl f’każin.
L-akkuża tgħid li hawn huwa kien sforza lil martu biex tagħmel atti mhux kunsenswali miegħu. Dan għaliex l-akkużat ried li jkollu x’jaqsam sesswalment ma’ martu iżda l-mara bdiet tirrifjuta b’mod ripetut u bdiet tgħidlu biex iħalliha bi kwieta, u kien hawn li allegatament l-akkużat ma riedx jieqaf, bil-mara ma tiqafx tibki, bl-akkużat jgħidilha li aktar ma tibki aktar kien se jirvilla,
L-akkużat li ismu ma jistax jissemma fuq ordni tal-Qorti, fejn ukoll ma jistax jissemma isem il-mara, qed jiġi akkużat ukoll li kellu fil-pusses tiegħu d-droga kokaina.
Ir-rapport mressaq l-għassa mill-allegata vittma
L-Ispettur Sarah Kathleen Zerafa qalet li fil-31 ta’ Mejju tal-2019 l-allegata vittma nfurmata għall-ħabta tal-10pm. kienet giet stuprata mir ragel taghha. Ix-xhud qalet li fuq din l-informazzjoni infethet inkjesta. L-akkużat ġie arrestat l-għada. Hawn hija nfurmat lill-Ispettur Paula Ciantar li bdiet tinvestiga.
Ciantar tkellmet mal-mara għall-verżjoni tagħha, fejn spjegat li hi u l-akkużat kienu ilhom miżżewġin għal madwar 14-il sena, u kienu bdew proċeduri ta’ separazzjoni. Qalet li dak il-lejl, l-akkużat kien mar id-dar u daħal fis-sodda b’riħa ta’ alkoħol, fejn infurmaha li ried jagħmel sess magħha.
F’ħin minnhom, huwa mar fuqha u beda jagħmel sess magħha. U f’xi punt bdiet tibki. Kien hemm episodju preċedenti ta’ natura simili aktar kmieni dik is-sena f’Jannar, li l-mara qalet li seħħ eżatt wara li hija rċeviet l-ittra ta’ medjazzjoni għal proċeduri ta’ separazzjoni li kienet bdiet.
Qalet li kien hemm perjodu ta’ żmien li fih it-tnejn kienu qed jidħlu f’relazzjoni sesswali konsenswali hekk kif l-akkużat indika lilha li ried jibdel u jaħdem fuq iż-żwieġ tagħhom. Iżda mbagħad iddeċidiet li tkompli bis-separazzjoni.
Waqt l-istqarrija li ttieħdet fil-preżenza tal-Avukat Dean Hili, l-akkużat qal li l-att kien kunsenswali u li hu u martu kienu għamlu s-sess orali u dan dejjem bl-approvazzjoni ta’ martu. Meta l-Pulizija kompliet titkellem mal-akkużat, qal li l-att dejjem sar bil-kunsens ta’ martu u li dan dam sejjer madwar 20 minuta.
Huwa qal li fl-ebda mument ma martu mbuttatu jew waqfitu u li hu ried jagħmel is-sess ma’ martu biex jirranġaw l-affarijiet ta’ bejniethom. Il-mara minn naħa tagħha qalet lix-xhud li dan ma kienx kunsenswali, u fil-fatt kienet qed issofri skumdità bħala riżultat tas-sess orali.
Għall-akkużat qed jidher l-Avukat tal-Għajnuna Legali Simon Micallef Stafrace u Julia Micallef Stafrace. Il-prosekuzzjoni qed titmexxa mill-Avukati Darlene Grima u Jenifer Polidano mill-uffiċċju tal-Avukat Ġenerali.
//= $special ?>